Ua lipotia mai nei le taofia ai e le Ofisa i Tiute ma le Ofisa o Leoleo o le oo atu i le 23 kilokalama o le pauta faasāina o le methamphetamine ma le sili atu i le 1000 fualaau faasāina ua ta’ua o le MDMA poo le ecstasy e iloa ai e le lautele.
Faamauina e ala i se pepa o faamatalaga a le ofisa o tiute, na faatautaia su’esu’ega ma iloiloga a auaunaga e lua talu mai le amataga o le masina e pei ona faaigoa ai lea galuega tele o le Operation Armani.
Ma o se galuega na mafai ai ona iloa ai se vaega poo se kulupu o loo faia gaioiga faasolitulafono o le aumai faananā ai o pauta faasāina i totonu o Niu Sila i le tele o masina.
I le faatautaiga o le galuega a auaunaga e lua, e faamauina na maua ma faasalavei le gaioiga a i latou o loo aafia i le matāupu ma taofia ai le 23 kilokalama o le meth i itu tuaoi.
Ma e tusa ai ma faamaumauga e silia ma le 8 miliona le tau atoa pe a faatauina i le maketi.
Ae mo le ecstasy e oo atu i le $50,000 lona tau pe a ono faatau i le maketi.
Ua ta’ua i pepa o faamatalaga, le faatautaia e le vaega o le Organised Crime Group, le Customs district investigators ma specialist support groups a Niu Sila o ni sa’iliga ma osofa’iga e faaaogā ai tusi faataga poo search warrants i le tele o itu o Ueligitone.
I taunuuga o ia as’iliga, na faamaonia ai le taofia e leoleo o ni alii se to’afā e 26 aga’i i le 30 tausaga le matutua mai Hutt Valley ma aai o Ueligitone.
E ta’ua le ogaoga o moliaga e ono molia uma ai i latou nei.
E aofia ai le faaulufale ma le faamoemoe e tufatufaina atu fualaau faasāina o le meth, o le umiaina ma le faamoemoe e tufatufaina atu o le nakoti o le cocaine o le MDMA poo le ecstasy ma le fauaalau faasāina o le maruana.
Na ta’ua le tula’i ai o i latou nei i luma o le Faamasinoga Faaitumalo i Lower Hutt ma Ueligitone.
Puna o Faamatalaga: https://www.customs.govt.nz/about-us/news/media-releases/meth-and-mdma-seized-in-joint-policecustoms-investigation
