E tasi le vaiaso o le a toe mālōlō uma ai a’oga i Samoa ae se’i faatino galuega o puipuiga e ala i le faamamā o nofoaga uma o loo nonofo ai iniseti o le namu e feavea’iina le vairusi o le faama’i o le fiva o ponaivi poo le dengue fever, o se galuega o le a fana ai foi ma nofoaga tu lalata i falea’oga.
O le fono a le Kapeneta i le vaiaso nei na faia ai le faai’uga e toe faamālōlō uma fanau mai a’oga e amata atu i le Aso Gafua a sau e oo i le Aso Faraile o le vaiaso o muamua nei ae faatino ia galuega o puipuiga ua fautuaina ai e le Sui Palemia le atunuu atoa e galulue faatasi le atunuu faapea auaunaga a le malo aemaise i le Matāgaluega o Tinā ma Tama’ita’i, Atina’e o Afio’aga ma Aga Fesoota’i.
Le afioga Tuala Tevaga Iosefo Ponifasio le Sui Palemia o le malo tausi i se vaega o lana saunoaga faalaua’itele i auala o fesoota’iga a le malo.
Ua faailoa e le Matāgaluega o le Soifua Mālōlōina e talu mai Ianuari o le tausaga nei e oo mai i le masina lenei o Iulai, ua faamauina e 1,756 gasegase ua faamaonia ua maua i āuga o le fiva o ponaivi.
Ua faailoa foi e le matāgaluega e lua vairusi o lea faama’i ua pesia ai lo tatou atunuu, o le Dengue fever Virus 1 ma le Dengue fever Virus 2.
O nisi o tapenaga mo togafitiga ma puipuiga ua faailoa faalaua’itele e le afioga i le Sui Palemia:
Le una’ia o tulaga moomia mo le ofoina fua o le toto (blood donation) e taulamua ai le Sosaiete o le Koluse Mūmū, e galulue faatasi ai ma le Matāgaluega o le Soifua Mālōlōina, ina ia lava paina toto faaleoleo mo gasegase tigāina;
Le faataoto ma le faatulagaina o vaegatupe o loo faaagaga mo faalavelave tutupu faafuase’i a le Mālō mo le faatupeina o vaega moomia e tauala atu i le Matāgaluega o Tupe;
Le faatinoina o feutana’iga talafeagai ma paaga mo le faatupeina o galuega moomia a le Matāgaluega o le Soifua Mālōlōina e tauala atu i le Matāgaluega o le Va-i-Fafo ma Fefaataua’iga;
Le faaaogāina o taavale a Matāgaluega ma Faalapotopotoga a le Malo e fesoasoani ai i taavale a le Matāgaluega o le Soifua Mālōlōina mo galuega faatino, ma lea faai’uga o loo ōgatasi ma le Ta’iala mo Faama’i e feavea’ia e namu ma iniseti faalafuā (Vector Control Strategy 2023 – 2030) ma le Tulafono o le Soifua Mālōlōina 1959.
Ua talosagaina e le malo le mamalu o le atunuu, pisinisi, vaega tuma’oti ma Matāgaluega ma Faalapotopotoga uma a le Malo ina ia utagia le tuualalo a le Malo ina ia galulue faatasi e tineia le pepesi o le fiva o ponaivi.
Ua tatala ai nei le ofisa tutotonu mo galuega i taimi o faalavelave faafuase’i mo le faatinoina o auaunaga uma e tali atu ai i le pepesi malosi o le fiva o ponaivi.
