E faato’ā manuia se talosaga mo se penefiti a se tagatānuu o Samoa ua maua le sitiseni i Aotearoa i le tulafono o le sitiseni o tagata Samoa i Niu Sila, pe afai ua faamautū ua nofomau ma ua taofi le toe maua o lana penisione a le aumatutua i Samoa.
Ua faailoa e le tofa Teleiai Edwin Puni o se tamālii sa lotolotoi i le taumafaiga o le sitiseni a o tatou tagata na soifua mai i lo tatou atunuu i le vaitau o le tausaga e 1924 i le 1948, o se tasi lea o faafitauli o loo feagai ma tuaa sinasina o Samoa ua maua le sitiseni ma ua malaga atu i Niu Sila ma faatasia ai ma fanau ma aiga.
E le’i maua se numela o se aofa’iga o o tatou tagatānuu ua nofomau nei ma ua maua tupe o le penefiti.
Se talanoaga ma le tofa Teleiai Edwin Puni.
Ua faailoa e lea tamālii i se pepa faalaua’itele o le taimi nei o loo iai se auaunaga ua ta’ua o le Faliu le La support group o loo faamaopoopo e le Asa Foundation mo aiga o tuaa ua maua sitiseni, i se auala e fesoasoani a i faamatalaga e faatatau i faamanuiaga e agavaa iai.
