Ua lē mafai i finauga a le loia sa tauaveina tagi e lua a sui faatutū o le pati faaupufai o le Faatuatua i le Atua Samoa ua Tasi, ona faamalieina le faamasinoga i mau sa ia folasia e teena ai le talosaga sa faaulu e le loia a sui tauva o le vaega e puipuia aiā tatau a tagata, lea sa finau ai e taofi pe strike out, le su’esu’eina o lu’i sa faaulu e le tofa Paloa Louis James Stowers faasaga i le tofa Lealailepule Rimoni Aiafi, ma le lu’i a le tofa Ale Vena Ale faasaga i le agavaa o le afioga Pepe Christian Fruean o sui tauva uma o le itu faaupufai e puipuia aiā tatau o tagata.
O le taeao o le Aso Tofi na aumai ai le faai’uga ua lē mafai ai ona faaauau le su’esu’eina o ia lu’i sa autū i le finauga e le’i atoa aso sa iai i Samoa Lealailepule ma Pepe ona sa malaga i Niu Sila i ni siiga gasegase.
O le faamalieina o le faamasinoga i mau o le talosaga e taofi le su’esu’eina o ia tagi, ua lē gata ua faalēaogā ai i le pule a le faamasinoga o faigāpalota le su’esu’eina o ia matāupu ae ua faatonu ai ma Paloa ma Ale e totogi atu le ta’i lua afe tālā i itu na o la molia.
Ua taoto mai ai nei ua tolu matāupu tau faamasinoga i lu’i faasaga i agavaa e avea ai ma sui tauva sa faaulu e nisi o sui faatutū o le vaega faaupufai o le Faatuatua i le Atua Samoa ua Tasi ua lē manuia.
O ia matāupu e aofia ai le lu’i a le sui tauva o Muaaufaalele Mary Faafouina Ta’eu faasaga i le agavaa o Leatinuu Wayne Sooialo o le sui tauva o le Samoa ua Potopoto, ma tagi e lua faasaga i sui tauva e to’alua o le vaega e puipuia aiā tatau a tagata.
O loo faaauau pea galuega a le faamasinoga o faigāpalota i isi tagi o loo totoe, ae faato’ā su’esu’e isi lu’i i le vaiaso a sau.
