O le 160 o le pasese na faamaonia avanoa e malaga mai ai i Apia mai Amerika Samoa i le malaga a le Lady Samoa IV mai Pago Pago i le faai’uga o le vaiaso na te’a nei, e na o le 100 le pasese na faataga e le vaega o le puipuiga o le saogalemu o le gataifale o le malo o Amerika Samoa le US Coast Guard ona malaga mai i le Lady Samoa IV.
Na mafua lea tulaga e pei ona lipotia e le Talanei News i Amerika Samoa, ona o ni faaletonu na maua e le Coast Guard i vaa faaola o le Lady Samoa IV lea e faapea e lē ola le afi o se tasi o vaa faaola poo le lifeboat.
Na maua lea faaletonu i le siaki masani a le vaega o le puipuiga o le saogalemu o le gataifale a le teritori.
O lea faaletonu na mafua ai ona tuai ona tuua e le Lady Samoa IV Pago Pago mo lana malaga toe foi mai, ae na faato’ā taunuu i le uafu i Matautu i Apia i le taeao o le Aso Sa na te’a nei.
