O le galuega a le komiti o faalavelave faafuase’i a le Malo ua faagasolo ai le fagaina o lotoā ma totonu o potu o falea’oga i le atunuu ina ia mamate iniseti o le namu o loo feavea’iina le vairusi o le fiva o ponaivi, ua ave ai se tuualalo a le Sui Ofisa Sili o le Matāgaluega o Tinā ma Tama’ita’i, Atina’e o Afio’aga ma Aga Fesoota’i i ta’ita’ifono o komiti a Fono Faavae o itumalo e 51, ina ia silasila ane e faaaogā ni tupe o le miliona lona tolu lea ua faasafua atu, e fesoasoani ai i le faatauina o le vailaau o loo faga ai le namu.
E lua ituaiga o vailaau o loo faaaogā i lea galuega e pei ona faailoa e le Sui Faatonu Sili o le soifua mālōlōina.
Ua avanoa ai aiga e iai a latou masini fana vao e tuuina atu e faaaogā i le galuega o loo faatino e nisi o le ‘aufaigaluega mai auaunaga eseese a le malo faatasi ai ma sui o le soifua mālōlōina.
E tusa ma le 150 afe tala se vaegatupe ua amata ai ona faatino le galuega o puipuiga o le atunuu mai le pepesi o le fiva o ponaivi, ae ua faailoa e le Sui Faatonu Sili o le soifua mālōlōina, o loo faatalatalanoa ni fesoasoani e ono maua mai i le faigāpaaga a le matāgaluega ma le faalapotopotoga o le soifua mālōlōina o le lalolagi.
E pei ona silafia o le teena o le tala o le tupe a le malo, ua faasoasoa ai nei nisi o seleni o loo faaagaga mo galuega o le puipuiga o le atunuu mai le dengue fever poo le fiva o ponaivi.
