O loo talosagaina e leoleo le mamalu o le atunuu lautele, ina ia fesoasoani atu i le latou pitolaau, e ala i le lipotia atu o ni faiga o loo faileagaina ai fanau poo le child abuse.
E tele nai fanauiti ua ma’umau soifua mai nei faiga lē alolofa i nai masina talu ai nei, ma e to’atele fanau a lē o le ma’umau ai o ola poo le matuā faamanu’alia mai le faaitu i lalo o le motu i Mātū o le atunuu.
E iai se pepe e na o le 3 masina le matua na taofia i le falema’i i Masterton i le aso 25 o Iulai ma mulimuli ane auina atu i le falemai o tama’iti i Aukilani, le Starship Hospital, ma na loka mai ai ma molia se alii e 22 tausaga le matua, i moliaga o le faaoo manu’a ma le faamoemoe ina ia matuā faamanu’alia ai lenei alualutoto, ma ua tuuina atu iai se poloa’iga e taofia ai ona toe fesoota’i ane i lenei tamaititi.
O se isi pepe e na o le 6 masina le matua lea na maua ma ni manu’aga ogaoga i se fale i Foxton Beach i le masina lava o Iulai, ma mulimuli ane uma le ola o si nei tamaitiiti, ae oo mai le taimi nei e le’i iai se tasi ua molia i lenei faalavelave.
O lena lava masina na maua ai foi se isi pepe e na o le 3 foi masina le matua, ua matuā ogaoga ni vaega o ponaivi o lona tino ua gaui se’i tulou, i ona lima, vae ma isi vaega o le tino ma taofia ai i le falema’i i Hutt Hospital.
E lē na o le pau ai lena o ni fanau ua lipotia mai e leoleo le faileagaina pe sauāina ogaoga e i latou sa tatau ona tausia ma vaaia nei fanau, ma o le augani mai lea a leoleo i le atunuu lautele, ina ia fesoasoani atu ma lipotia soo se faalavelave o loo aafia ai ola o nai fanauiti.
Puna o Faamatalaga: https://www.rnz.co.nz/news/national/572061/police-ask-for-public-for-help-reporting-child-abuse-can-t-battle-this-alone
