Ua avatu se faatalosaga a le Pulega a Aukilani i le faigāmalo, ina ia fesoasoani mai e taofia i latou o loo fai o latou fale e mautotogi ai tagata i potu poo boarding houses, ona ua matuā taaalo ai lava nei tagata i ola ma ave tupe a nai tagata o loo ola i penefiti ma i latou sa falepuipui muamua ae o loo nonofo ai i nei fale i ni tulaga sili ona leagafaia.
I se polokalame a le Pulega a Aukilani e ta’ua o le Proactive Boarding Inspection Programme, o loo taumafai ai e tulituliloa tagata nei e iai o latou fale e ta’i lima ma ta’i ono potumoe, ae ua liliu faasolitulafono e nei tagata i le ta’i 27 tama’i potumoe ina ia mautotogi ai nei tagata.
O le Aso Lua, o ananafi lea na sau ai i tua le lipoti a le pulega e faapea, i le tausaga e tasi na faai’u ia Iulai o le 2025, e 30 fale mai fale e 34 na faia iai ni asiasiga ma iloa ai le solitulafono o le faiga o suiga i nei fale.
E tele fale na asiasia ma iloa ai, e solitulafono le faiga ma o ni fale na tuuina ane iai mai le vaega a le Work and Income (WINZ) poo le Matāgaluega o Falepuipui.
E foliga mai o le utiuti o fale ma le lē lava moega, ma le puupuu o le taimi sa sa’ili ai, o lea ua faaaogā ai nei matāgaluega nei fale e ui i le lē talafeagai mo le nonofo ai.
Na ta’ua e se tasi o pule mai le vaega a le pulega, Adrian Wilson, o faafitauli autū na latou maua i nei asiasiga, ua to’atele na’ua tagata e nonofo faaofiofi i se fale, ma e telē se lamatiaga i le tulaga o le ono mu o le fale.
O le faatalosaga la lea a le pulega i le faigāmalo, ina ia iai se faiga mo le atunuu atoa, e fesoasoani i matāgaluega nei e pei o le WINZ ma le matāgaluega o Falepuipui, ina ia iloa ai le aofa’iga o boarding houses o loo latou faaaogā e faanonofo ai tagata.
Ua ta’ua ai foi e tatau ona iai se faiga e molia ai tagata nei e ona fale pe afai e lē o usita’ia ta’iala talafeagai mo mei falenofo.
O le fautuaga, e lelei pe a ta’i 12 lava masina ma faia asiasiga nei.
Puna o Faamatalaga: https://www.rnz.co.nz/news/national/571873/auckland-council-calls-for-government-to-help-crack-down-on-illegal-boarding-houses
