O le vaiaso na te’a nei na tuuina atu ai lipoti e tusa ai ma popolega na faaalia e se tasi o faalapopotoga i Niu Sila nei, i le mata’utia o aafiaga o le faatino ai o le taaloga o le Run It Straight, ma na tuuina atu ai foi ma taunuuga o lea lava taaloga i le tau amatalia ai o polokalame, e pei ona aafia ai ni alii se to’alua, ina ua feto’ai ma matapogia ai i luga o le malae, ma oso ai le ma’i poo seizures o le tasi o alii.
Ae o lea ua maua tala faanoanoa i le maliu ai o se tamaitiiti e 19 tausaga lona matua, i le faatino ai o lea ituaiga taaloga.
O lē ua maliu e suafa ia Ryan Satterthwaite.
I lipoti mai le leitio faavaomalo a Niu Sila, e fai lava sina tugā o manu’aga i le ao poo le ulu o le alii talavou, ona o lona taumafai ai e faatino lea taaloga ma se isi.
Ma i le alia’e mai ai o lea faalavelave mata’utia, ua talosagaina ai e se tasi o le aiga o Ryan poo si ona uncle o Pete Satterthwaite ina ia taofia loa pe tapu i totonu o le atunuu le faatino ai o le Run It Straight.
Faaalia e Pete, ina ua ia matamata i talavou e tusa ai ma lea taaloga, o lona manatu e lē talafeagai lea ituaiga taaloga, ma e i’u lava ina aafia ai se tasi, ma le lilo i lona manatu o le a aafia ai si ona tei.
Na ta’ua e Pete, ua mātele ina tata’i mafaufau a tamaiti ma tupulaga talavou i lenei vaitau i mea o loo tuu mai i luga o itulau ma upega tafa’ilagi le social media, ma o le ala lea ua tele ina o latou faata’ita’i ma faia le tele o gaioiga ma taaloga, ma oo ai lava ina oo i puapuaga.
Talosaga foi Pete i tagata taualoa i taaloga lakapi e pei o nisi o le All Blacks ma le to’atele ina ia tutū faatasi e tuu atu se fautuaga ae o se tuualalo i le lē saogalemu o lea taaloga, atonu o le a faalogo iai talavou ma tamaiti, ma taofia ai loa le toe faia o lenei taaloga i totonu o le atunuu.
Ua molimauina i luga o ala o fesoota’iga le tuu atu o faamaisega, ma na ta’ua foi le lolofi atu o le to’atele o uo ma ē masani ma Ryan i le falema’i ina ua tula’i mai lea faalavelave.
Ta’ua e le aiga o Ryan o lenei alii o se tagata tausaafia ma le alofa.
Puna o Faamatalaga: https://www.rnz.co.nz/news/national/562363/uncle-of-ryan-satterthwaite-calls-for-cancellation-of-run-it-events
