Ua momoli atu faamaisega mai le ofisa sooupu o galuega faavaitaimi a Samoa i Niu Sila faapea le aufaigaluega mai lo tatou atunuu i le kamupani o le Thornhill ona o se tasi o taule’ale’a talavou sa galue i ia galuega, ae ua motusia faafuase’i le mafutaga ma aiga ona o se faalavelave tau taavale i le Aso Toonai na te’a nei, na tupu i se vaega o le alatele i Tuanaimato e latalata i le faletaalo numela tasi le Gym One.
E to’alua tagata na maliliu ai i le faalavelave e aofia ai le taule’ale’a sa galue faavaitaimi i Niu Sila.
O le isi to’alua o tagata o loo taofia i le falema’i i Motootua ona e tigāina o la manu’aga mai le faalavelave.
O le to’alua ua maliliu ma le to’alua o loo taofia mo togafitiga o le pasese a se taavale laitiiti la’upasese na aafia i le faalavelave.
Ua faailoa e leoleo o le isi taavale na aafia i le faalavelave o se pikiapu o le ituaiga o le Ford Ranger.
O loo faia su’esu’ega a leoleo i le mafua’aga o le faalavelave.
