E 32 tausaga le matua o se tamā e faamautū ma lona aiga i Brisbane i Ausetalia ua faamamā e le faamasinoga a le atunuu lona suafa mai se solitulafono ina ua talia ai le talosaga a lana loia, e faapafala le faamaonia o se faasalaga o Tauilo Junior Perelini Sefo, lea sa ioe i moliaga o le ave taavale faatamala ma le ave taavale a o aafia i le ‘avamalosi.
E ui ina faapafala le faamaonia o sana solitulafono ae ua faatonuina o ia e totogi le tasi le afe tala poo le nofosala i le falepuipui mo le ono masina.
O lea tupe o le totogi o le galuega a le faamasinoga.
Faaalia i faamaumauga a leoleo o Tauilo sa malaga mai i Samoa e fai lona matai, ma o le mae’a ai o lea faamoemoe sa ia aveina ai se taavale rent a o faasuā’avā.
Na tupu se faalavelave ina ua tifa i tua le taavale ma faaleagaina se vaega, ae e leai se soifua na aafia.
Ua faailoa e lē ua molia i le faamasinoga e talu mai le aso o le faalavelave e le’i toe tago i le ‘avamalosi ma o se itu lelei lea i le iloiloina o le faai’uga a le faamasinoga.
Sa tatala e le faamasinoga le malaga i Ausetalia o lē ua molia, ma le tuutuuga e toe foi mai i le aso e lau le faai’uga, ma sa usita’ia e lē ua molia lea aiaiga.
