O loo tapena le finagalo tusitusia a le Nofo a Faaaloaloga o le Falefitu o le Aiga Taua’ana, e tuuina atu e tali ai i le Komesina o faigāpalota e tusa o lona finagalo ua faailoa lautele e faatatau i se faai’uga a le Falefitu ua teena ai faalauiloa a isi patī faaupufai ae lē aofia ai le patī e puipuia aiā tatau a tagata, ona solia eleele ma fanua o Falelatai amata mai Si’ufaga e oo i Matautu.

Faaalia e se tasi o tamalii o se matai o le saofa’iga o le Falefitu le afioga Nanai Faamanū Ivara, o le Aso Toonai e tatau ona oo atu iai ua mautū se finagalo autasi o Nofo a Faaaloaloga.

Ua faailoa foi e lea tamalii ua talia e le Falefitu o le Aiga Taua’ana le tuualalo a le afioga i le Tamaaiga le afioga i le Ao o le Malo afioga Tuimalealiifano Vaaleto’a Sualauvi II, ina ia talia le afea o Falelatai e le vaega faaupufai o le Samoa ua Potopoto, lea o loo iai lo latou sui tauva mai lea itumalo faapalota o le atunuu.

O le fono i le Aso Toonai nei a le Nofo a Faaloaloga o le Falefitu o le aiga Taua’ana e faamautū uma ai ia tulaga e pei ona faailoa e le afioga Nanai Faamanū Ivara.

E pei ona silafia o le teena o le afea o Falelatai i ni faalauiloa a isi patī se’ia vaganā le vaega e puipuia aiā tatau a tagata, na tusi ai i le Komesina o faigāpalota le ta’ita’i o le Samoa ua Potopoto.

O le finagalo o le Komesina ina ua fesiligia e tusitala i le vaiaso ua mavae, e solitulafono le faai’uga a le afio’aga.

O le palota tele o le 2021 ma ona foi tapenaga sa faia iai foi le afioga Tutasi o le Nofo a Faaaloaloga i le Falefitu o le Aiga Taua’ana e tapu faalauiloa a vaega faaupufai i o latou fanua, le palota tele lea sa na o le vaega faaupufai e puipuia aiā tatau a tagata ma le Faatuatua i le Atua Samoa ua Tasi sa tauva ai.

Faaalia e Nanai Faamanū na te lē iloa pe aisea ua toe fesiligia ai le faai’uga e le afioga Fiame Naomi Mataafa i le taimi nei, ae sa le’i fesiligia i le palota tele o le 2021.

Faaalia e lea matai o le Nofo a Faaaloaloga sa ave foi le tusi i le afioga i le Sa’ofaapito a o ta’ita’i i le Faatuatua i le Atua Samoa ua Tasi.

O le tausiga o le nonofo fealofani ma le nonofo filemu o le afio’aga na faaalia e Nanai Faamanū Ivara o le mafua’aga tonu lea o le faai’uga.