Ua talia e le faamasinoga o talosaga toe iloilo a le Faamasinoga Maualuga le talosaga a Talalelei Pauga e ala i lana loia, ma ua faatonuina ai le tuuina atu i le loia a Talalelei o faamaumauga poo transcripts o su’esu’ega a le faamasinoga ua mae’a i moliaga o Lema’i Faioso Sione, o Malele Atofu Paulo, ma Taualai Leiloa.
O i latou ia sa faamaonia moliaga e pei o tuua’iga o loo molia ai Talalelei Pauga.
Sa faia se faai’uga a le Faamasinoga Maualuga sa teena ai le tuuina atu o ia faamaumauga ma o se isi lea o mafua’aga na tuai ai ona faamautū se aso e fofogaina ai molimau a leoleo e lagolago ai le moliaga o le taupulepule e faaoo le maliu i lē sa avea ma Palemia lea o loo tuua’ia ai Talalelei, ona sa faatali le apili.
O le tasi o faai’uga a le faamasinoga o talosaga ua faatulaga ai le aso 6 o le masina o Oketopa o le tausaga nei e valaau ai molimau o lea matāupu.
O le tausaga e 2023 i le masina o Setema na aumai faapagota ai mai Ausetalia i Samoa lē ua molia e tali moliaga a leoleo i le faamasinoga a Samoa.
