Ua faailoa lautele se finagalo o le afioga i le Fofoga Fetalai o le paeaiga 17 a le Palemene na faatā’ape aloa’ia i le Aso Lua o le vaiaso nei, ma ua tali atu ai i se finagalo o le tamaitai Palemia i le feiloa’iga ma tusitala i le tuana’i o le tauaofiaga a le fono aoao i le Aso Lua ua mavae na teena ai le tala autū o le tupe.
Ua faaalia e le Fofoga Fetalai susuga Papalii Li’o Oloipola Ta’eu Masipa’u e iai tiute tauave o lona tofiga faapea le Sui Fofoga Fetalai o loo aiaia faaletulafono e faaauau se’ia oo ina ulufale i le Palemene le isi paea’iga fou.
Ua faaalia e Papalii e lē o se avanoa e tietie fua ai e pei ona saunoa le Palemia tausi, ae o se tofiga sa aloa’ia i le faavae talu mai le taimi o le tuto’atasi o le atunuu.
O le fuaiupu 30 o le tulafono o pule ma tulaga aloa’ia o le fono aoao faitulafono o loo aiaia ai e lē taofia pe faamutaina tofiga o le Fofoga Fetalai ma le Sui Fofoga Fetalai i le taimi e faatuua pe faatā’ape ai le Palemene.
