E uigaese le tulaga ua iai le tau o pasese mo femalagaa’iga atu mai Ausetalia i isi atunuu e aofia ai ma Samoa.
Ua toatele ua faailoa luitau ua feagai ma latou i le tau sailiga o ni pasese e gafatia mo faigamalaga aemaise i le malaga atu mai Sini.
Mo le malaga atu i Samoa mai Sini ua maitauina ua silia ma le afe tala Ausetalia le tele o pasese i le vaiaso lava lenei ia i le One Way ma ua maitauina afai o se malaga alu ma toe foi mai ua faaluaina lea vaegatupe.
Ua faaseā nisi i talafou ua fiafia foi ua toe tatala tuaoi ma toe gaioi pisinisi tau vaalele i le tulaga sa iai muamua auaunaga a o lei oo mai le koviti ae peitai o se faafitauli tele ua alia’e nei i le matuai taugata o pasese.
Fai mai nisi e tele faapitoa o loo faia a vaalele peitai o nei faapitoa e tai pei o le malaga atu mai Sini i Aukilani ua toeitiiti lava foi oo i le 400 tala Ausetalia i le one way.
O finagalo o nisi ua faailoa ai e fai o le taugata o pasese ae o le maualalo foi o le rate o le tala Ausetalia ua iai nei pe afai e lafo foi tupe i le Pasefika, ua lē o toe tutusa ma tausaga ua tea.
