O tagata e 76 ua faatulaga e faia moilumau tuu fofoga e lagolago ai moliaga solitulafono o le susuga Laauli, le afioga Fepuleai, o Li’o Faataumalama, Lise, Samuelu ma Sivai, o le Komesina o le Matāgaluega o Leoleo, Falepuipui ma le Toefuata’ina le tofa Auapaau Logoitino Filipo na amata ai molimau a leoleo.
O le Aso Gafua o lenei vaiaso na amata ai su’esu’ega a le faamasinoga e pei ona fuafua e tasi le vaiaso e faagasolo ai taualumaga o lenei matāupu tau faamasinoga.
O le molimau a le Komesina o leoleo na faailoa ai le aotelega atoa o le mea na tupu mai le su’esu’ega muamua i le faalavelave tau taavale na aafia ai le soifua o Tuuau Maletino lea e le’i maua e leoleo ni mau e faia ai ni moliaga, se’ia oo ina tāpā le Komesina e le tasi o i latou e to’aono o loo molia le afioga Fepuleai Faimata Su’a, a o avea ma Minisita Lagolago o le matāgaluega o leoleo, e tuuina atu le faila o su’esu’ega muamua a leoleo.
Na faailoa e Auapaau i lana molimau na te le’i tuuina atu le faila ona e lē mafai i le tulafono a leoleo ona ave se faila o se su’esu’ega o se solitulafono i se tagata e lē o se leoleo.
Na sosoo lea ma se valaau na maua e Auapaau mai le tasi o i latou o loo molia le susuga Laauli a o avea ma Minisita o le Kapeneta, na faailoa ane ai e mana’omia se la feiloa’iga i le ofisa o le minisita.
Na faamatala le Komesina o le aga’i mo lea feiloa’iga na la feiloa’i ai ma le tasi o loo molia o Li’o Faataumalama o loo aga’i atu foi i le ofisa o Laauli i le aso lea.
O se feiloa’iga na auai ma le Minisita o le Matāgaluega o Leoleo, Falepuipui ma le Toefuata’ina.
Sa faaalia e le molimau o le feiloa’iga lea na faato’ā ia silafia ai le faailoa ane e Laauli o se su’esu’ega na latou faia i le faalavelave na maliu ai Tuuau Maletino ma ua maua a latou mau malolosi o le tofa Lealailepule Rimoni Aiafi na lavea ai Tuuau i lana taavale.
Na faaalia e le Komesina sa faailoa ane ai foi e le Minisita o le matāgaluega o leoleo o le a solomuli ese ma le matāupu ona e iai lona sootaga faaleaiga ia Lealailepule.
O molimau malolosi na faailoa e Laauli i le feiloa’iga lea, o Sivai, Marie, ma Samuelu sa vaaitino i le taimi na tupu ai le faalavelave.
O le malolosi o mau a Samuelu, Marie ma Sivai na faanonofo ai i le faletalimalo o le Moanalisa i Vaitele, ma o le isi lea o talosaga a Laauli i le Komesina o leoleo ia ave molimau ia e faamautū i se nofoaga malupuipuia, lea na faanonofo ai i le faletalimalo o Lynn i Motootua, ma sa totogi e le matāgaluega o leoleo.
E tolu vaiaso na faaalia e Auapaau na ia faailoa ai ia Laauli i le latou feiloa’iga lea, e tuu atu se’i silasila ai leoleo i le vaega o taavaleafi i mau ua latou tuuina atu.
O le faai’uga o le masina o Iuni o le tausaga e 2023 ina ua mae’a lea feiloa’iga i le tau amataga o le masina lava lea, na mae’a ai su’esu’ega a leoleo sa ta’ita’ia e se leoleo asiasi poo se police inspector.
O le taunuuga e lē faamaonia mau sa tuuina atu, ma sa logoina foi Laauli i se feiloa’iga ma le Komesina.
Na faamatala le komesina i lana molimau sa ia vaaia le lē fiafia o Laauli ma avatu ai sona finagalo, ae ā pe a pu’eina loa Lealailepule ae ave i se potu e avatu iai ma Samuelu e fai se la finauga e iloa ai poo ai e sa’o.
Na faailoa e le Komesina sa ia fautuaina Laauli e lē mafai se tulaga faapea ona e puipuia i aiātatau o tagata aemaise ua mae’a a latou su’esu’ega e lē faamaonia mau na tuuina atu.
O le lua vaiaso talu ona mae’a lea feiloa’iga ae faailoa e Auapaau sa faate’ia i se faasalalauga na faatalanoa ai Samuelu i auala o fesoota’iga faaonaponei le Tautai A’e, ma sa ia matuā ofo ma lē talitonu i tuua’iga a Samuelu sa aga’i atu ia te ia, faapea nisi o leoleo.
Sa tāina le video o lea talanoaga o se tasi o vaega o molimau a le itu a leoleo.
O loo teena uma e Laauli ma i latou e to’alima o loo molia tuua’iga a leoleo, ma o loo faagasolo pea lenei faamasinoga.
O se alii ma se tamaitai loia mai fafo faapea loia e to’alua i Samoa o loo finauina tali tetee a ē o loo molia, ae o le tamaitai loia galue tuto’atasi o Leinafo Taimalelagi Strickland o loo finauina moliaga a leoleo ae lagolago iai se tamaitai loia mai le ofisa o le Loia Sili a le Malo.
