Ua tala malae le vaega faaupufai e puipuia aiātatau a tagata i le faia o le latou ulua’i faalauiloa o fuafuaga o le atina’e o le atunuu e finau ai i le palota tele a Samoa ia Aokuso.
O le vaega muamua o lea faalauiloa sa folasia ai e le ta’ita’i ma le sui ta’ita’i le faamuamua ia latou fuafuaga o le faia o se galuega i tagata e fesoasoani ai i le mativa ma le tau o le soifuaga.
Ua faailoa i lea tapenaga le maua e le tagata e to’atasi o le $500 tala i le tausaga mo tausaga e 5 o le paeaiga.
E le’i faailoaina i lea faalauiloa poo ā tuutuuga ma aiaiga e faatino e maua ai lea fesoasoani tau tupe.
Le ta’ita’i o le vaega faaupufai e puipuia aiātatau a tagata, susuga Tuilaepa Lupesoliai Sailele Malielegaoi.
O le sui ta’ita’i o le pati na saunoa e faalauiloa le vaega muamua o lana ta’imua i folafolaga faatosina o le palota.
Le tofa Lauofo Fonotoe Nuafesili Pierre Meredith o le sui ta’ita’i o le vaega faaupufai e puipuia aiātatau a tagata.
Sa faatumulia le maota o Petesa le nofoaga autū o lea pati i sui lagolagolago ma nisi o sui faatutū sa auai i le faalauiloa o le vaega muamua o le latou tapenaga mo le faigapalota o loo loma nei a le atunuu.
