O le ‘au a tama’ita’i Niu Sila le Black Ferns lea na tala malae ma le ‘au o loo tulaga 13 i le faatulagana o ‘au a tama’ita’i, le ‘au a Spain i le la taaloga i le taeao nei i le malae i York.
Na telē le va o ‘ai o lenei taaloga ina ua manumālō le Black Ferns a Niu Sila i ‘ai e 54 i le na o le 8 ‘ai o Spain.
E valu sikoa na maua e le Black Ferns, ma e uma ane le kuata faai’u o le taaloga e na o le to’a 13 teine na taaalo o le ‘au.
E ui i le manumālō a le ‘au ae o se vaaiga faanoanoa ina ua fata i tua le flanker a le ‘au si tama’ita’i o Kaipo Olsen-Baker, na manu’a lona vae taumatau.
Na iai foi isi tama’ita’i na manunu’a ae sa le’i mafai ona toe sui atu nisi e faaatoa ai le ‘au ona ua uma tama’ita’i taaalo sa faaleoleo, ae ui sa na o le to’a 13 tama’ita’i o le ‘au a Niu Sila, ae na toe tatao ai lava iinā isi sikoa e lua a le ‘au.
O le taamilosaga o le Ipu a le Lalolagi o loo faagasolo nei i Egelani mai le aso 22 o Aokuso e oo i le aso 27 o Setema.
Puna o Faamatalaga: https://www.rnz.co.nz/news/sport/570921/women-s-rugby-world-cup-live-black-ferns-face-spain-in-opener
