E tolu taaloga sa auai sui o Samoa lea ua faamae’a mai a latou taumafaiga, ma e momoli ai le faamalo ma le faafetai a le atunuu i nei alo ma tamafanau a Samoa, i lo latou agaga finau sa taumafai ai ia latou taaloga faatulagaina e ui lava ua lē tau lau o le faamoemoe i se pine mo Samoa, ae o le auai atu i nei taaloga pito maualuga i le faatulagaina o taaloga a le lalolagi, o se ‘ai lava lea mo Samoa, auā e lē taitai ona faigofie le sailiga o le agavaa e tauva ai i taaloga o le Olimipeka.

Muamua lava o le tauvaga o le lakapi taitoafitu lea sa tauva ai le Manu Samoa 7s ma sa faia’ina i ana taaloga muamua e lua o le Pool ia Ausetalia ma Aialani, ae manumalo i le taaloga lona tolu ia Kenya.

E lei maua so latou avanoa mo le sailiga o se pine peitai na toe faia isi ana taaloga e lua mulimuli lea na manumalo ai ia Iapani ae toe faia’ina ia Kenya ina ua saili le faatulagaina o ‘au o le taamilosaga, lea la ua tulaga sefulu ai nei le Manu Samoa i le faasologa o ‘au.

O le taaloga lona lua na tauva ai se sui o Samoa, o le faipelega poo fusuaga, lea na fusu ai le alo o Samoa, le alii o Tupuola Sesua’i Ato Plodzicki-Faoagali ma le alii mai Belgium o Victor Schelstraete i le paga mamafa (heavy weight) a alii o le 92kg, lea na faia i le Aso Gafua, 29 Iulai.

E telē se faamoemoega na iai e ono maua se pine a Samoa mai lenei alo o le atunuu, ae pagā lea e pei ona silafia, na maliu i se gasegase faafuase’i si ona faiaoga, le susuga a Lionel Elika Fatupaito, a o latou auai atu i taaloga ae ua toe o ni aso faataunuu le fusuaga muamua a Ato, ma e mautinoa na telē se aafiaga o tapenapenaga a si nei alo o le atunuu aemaise lava i lona mafaufau ma lagona.

E lei manuia le uluai taaloga a Ato ma muta mai ai loa ana taumafaiga, ae i sana faamatalaga i luga o fesootaiga televavave na ia faaalia ai, ‘e ui sa ia faatino lana taaloga ma se agaga tumu i le mafatia, ae sa ia taumafai i le mea sili na ia mafaia e faataunuu lana taaloga, a o ia mafaufau atu i si ona faiaoga, ma o lana toe faaaloalo foi lea mo lona faiaoga ma ana tapenaga uma sa faia mo ia.’

O le taaloga lona tolu sa tauva ai se sui e toatasi o Samoa, o le Judo i le vaega o alii o le 73kg lea sa tauva ai le alii o William Tai Tin ma le alii mai le United Republic of Tanzania, Andrew Thomas Mlugu i le Aso Gafua, 29 Iulai.

E lei manuia le taumafaiga a William ma o lea ua tulai mai ai nei Samoa i le tulaga lona 187 i le faatulagana a le lalolagi i lea foi faagatama.

Ua totoe ai nei taaloga e 6 o le a tauva ai sui o le Team Samoa, e pei o le siisii u’amea mamafa, alo paopao, tuuga vaafaila, aau, piiga, ma afereti.

O se isi lipoti o sosoo mai o le a taumafai e faailoa atu taimi o taaloga o le a tauva ai sui o le atunuu.