Ua poloa’iina e le faamasinoga le Komesina o faigāpalota ina ia soloia ma aveesea ma le lisi o le faasologa o suafa o sui tauva o le faigāpalota tele a le atunuu i le Aso Faraile o le vaiaso a sau, suafa o le tofa Ulugia Elon Piliopo Betham ma le afioga Muaaufaalele Mary Faafouina Ta’eu ona ua faamaonia i su’esu’ega a le faamasinoga o faigāpalota ua lē faamalieina e i la’ua aiaiga o le monotaga e agavaa ai ona avea ma sui tauva mo le itumalo faapalota o Faleata 2.
O Ulugia Elon Piliopo Betham sa lesitala e tauva mo le vaega faaupufai e puipuia aiā tatau a tagata, ae o Muaaufaalele Mary Faafouina Ta’eu sa lesitala e tauva i le fu’a a le vaega faaupufai o le Faatuatua i le Atua Samoa ua Tasi.
O faai’uga a le faamasinoga o palota i talosaga poo tagi e ala i lu’i sa fesiligia ai le agavaa i aiaiga o le monotaga sa fofogaina i le Aso Faraile na te’a nei.
O le taunuuga ua aumai mo le lu’i sa faaulu e le sui tauva o le pati faaupufai o le Samoa ua Potopoto mo le itumalo o Faleata 2 le tofa Leatinuu Wayne Sooialo, ua tula’i mai ai o le a leai se faigāpaota a lea itumalo.
O lona uiga ua mautinoa o le tofa Leatinuu Wayne Sooialo o le a toe seei i le nofoa o lea itumalo mo le isi lima tausaga o le paea’iga fou lona 18 a le Palemene, ma o ia foi le ulua’i sui filifilia mo le vaega faaupufai o le Samoa ua Potopoto.
Se finagalo o le tofa Leatinuu Wayne Sooialo i le mae’a ona lau le faai’uga a le faamasinoga o palota.
O ia o se tasi o Minisita o le Kapeneta o le malo tausi.
