I le 124 tausaga talu ona faavae le faalapotopotoga o fesoota’iga a Malo o le Taupulega ma usuia ana fono faaletausaga, ua faamauina nei o le tausaga lenei ua ulua’i tofia ai le usugafono a Samoa e ta’ita’ifono i le fono faaletausaga sa usuia i le aai o Lonetona i Peletania i le amataga o le masina nei o Iulai.
O le tama’ita’i Pule Faatonu le Regulator o le faauluuluga foi o lea auaunaga a lo tatou malo le afioga Lematua Gisa Tagaloaataoa Fuata’i Purcell sa fai ma sui o Samoa i lea fonotaga faavaomalo.
I se pepa o faamatalaga mai le ofisa o le Minisita o le malo tausi mo fesoota’iga ma faamatalaga faatekonolosi o loo faailoa ai, o le avea o le sē’ei ai o Samoa i le tofiga ta’ita’ifono o se avanoa tāua i le lauliliuina o matāupu i le faaleleia o le faalapotopotoga aemaise o le ta’ita’ia o galuega a le Komiti Faafoe.
O se avanoa tāua foi o le a malosi ai le leo o Samoa i totonu o lea faalapotopotoga o fesoota’iga a Malo o le Taupulega.
O se fua aliali foi lea o le maualuga o le silasila a le faalapotopotoga i le taligamalo a Samoa i le fono a Malo o le Taupulega sa usia ia Oketopa o le tausaga ua mavae.
