Ua amata faasolo nei le faitauga aloa’ia o palota, mo itumalo ta’itasi o le atunuu.

Ae o se vaaiga uigaese lea i lenei tausaga, o le vaaia ai o le to’atele o le atunuu ua aga’i mai i le faletaalo i Tuanaimato – le Multi-Purpose Gym, e molimauina le faitauga o palota.

E ui o loo iai ofisa faasalalau o loo faatinoina le tuusa’o atu o faasalalauga i le faitauga o palota a o lipoti i ni tala lata mai o le galuega e pei ona masani ai. 

E ui i le to’atele ai o i latou o loo aga’i mai i lea nofoaga ae o loo maitauina le faatumauina pea o le mata’itūina lelei e le Ofisa o le Komisi o Faigāpalota ma le Matagaluega o Leoleo, ina ia mautinoa le mulimulita’ia o itu uma o le faatautaia ai o galuega, e pei ona faailo, e na o failautusi (scrutineers) e agai i totonu i le itu o loo iai le ‘aufaigaluega auā le maka ma le faamaumauina o palota, o palota muamua, palota faapitoa ma le atoaga o palota masani. 

Mo le silafia o le faagasologa o polokalame faataatitia a le Ofisa o le Komisi o Faigāpalota (OEC), o lea ua faatulaga itumalo ma vaega (teams) ua vaevae e tusa ai ma taimi e faatino ai faitauga aloa’ia. 

Ma o lea ua amata faitauga mai itumalo e 16 e aofia ai:

1. Vaimauga 1
2. Vaimauga 2
3. Vaimauga 3 
4. Vaimauga 4
5. Safata 2
6. Aana Alofi 2
7. Faleata 3
8. Faleata 4
9. Gagaifomauga 2
10. Palauli 2
11. Gagaaemauga 2
12. Alataua i Sisifo
13. Faleata 1
14. Vaisigano 2
15. Vaisigano 1
16. Palauli 3 

O nisi o itumalo o le a faasolo i isi o aso o lenei vaiaso ma o le a faaauauina ai foi ona mata’itūina ai e le to’atele galuega o loo faatino e failautusi o sui tauva uma ma sui o le ofisa o le Komisi o Faigāpalota. 

E tusa ai ma faamatalaga, e amata i le Aso Gafua lenei galuega tele se’ia pā’ia le Aso Tofi o lenei vaiaso.