O le Aso Lua o lenei vaiaso ua toe tauaofia ai le faamasinoga o faigāpalota mo le faamae’aina o su’esu’ega i matāupu tau i lu’i faaletulafono ua fesiligia ai le agavaa o nisi o sui tauva e faasino i monotaga faalenuu.
O le lu’i mulimuli ua taualuga iai su’esu’ega a lea faamasinoga, o le tagi na faaulu e le sui sa tula’i i le tofi faipule o Vaisigano 2 i le paea’iga 17 a le Palemene ae o le sui tauva mo le vaega faaupufai o le Samoa ua Potopoto le afioga Valasi Luapitofanua Toogamaga Tafito Selesele.
O loo molia i le lu’i lenei le sui tauva o le vaega faaupufai o le Faatuatua i le Atua Samoa ua Tasi le afioga Tagaloa Leilua Tupou Afa.
O le a su’esu’eina mau o lea lu’i e le afioga i le faamasino sinia o le Faamasinoga Maualuga le afioga Vui Clarence Nelson ma se tasi o faamasino o lea lava faamasinoga le susuga Leiataualesa Darrel Clarke.
O isi lu’i ua mae’a ona su’esu’eina i le vaiaso ua mavae ua faatali nei ni faai’uga lea ua faatulaga e fofogaina i le Aso Faraile o le vaiaso nei.
