O le tapenaga a le vaega faaupufai e puipuia aiā tatau a tagata i ana fuafuaga o le atina’e manuia o le atunuu auā ana faalauiloa o folafolaga faatosina o le palota tele, ua faailoa e le ta’ita’i o lea pati faaupufai sa faapena ona tapenaina e sui o le vaega faaupufai ua iai le agavaa ma le poto faapitoa, aemaise o nisi sa i totonu o le tapenaina o fuafuaga tau tupe a le malo a o tula’i le H.R.P.P. i le pulega o le malo i tausaga ua mavae.
Na faailoa lea tulaga e le susuga Tuilaepa L Sailele Malielegaoi i le faalauiloa a lana vaega faaupufai sa faia i Salelologa i Savaii i le Aso Lulu o le vaiaso nei, ma na faalauiloa ai foi suafa o i latou uma nei: Fepulea’i Letufuga Atilla Ropati (peresetene a le Faamasinoga o Fanua ma Suafa), Pauli Prince Suhren (pule sili a le NPF), Leausa Take Naseri (ofisa sili a le matāgaluega o le soifua mālōlōina), Matafeo Avalisa Viali-Fautua’alii (ofisa sili a le matāgaluega o tiute ma tupe maua), Fuimaono Sefo Ainuu (loia i le ofisa o le loia sili), Faimalo Matthew Lemisio (komesina o faigāpalota), ma Leasiosio Oscar Malielegaoi (ofisa sili a le matāgaluega o tupe).
O le Aso Faraile ua mavae na ulua’i faia ai le faalauiloa o le anavatau atoa a lea vaega faaupufai i Upolu lea sa tumutumu ai Petesa le maota o loo avea ma nofoaga tutotonu o le pati faaupufai i Sogi.
O se tasi o tapenaga a le vaega e puipuia aiā tatau a tagata e fesoasoani ai i le tau o le soifuaga, o tupe ta’i afe tala o le a maua mo pepe fou e fananau.
O se fuafuaga e fesoasoani ai i ulugalii i le tausiga o fanau i lo latou tuputupu a’e.
E ui o se fuafuaga o loo manino lona mafua’aga i le anavatau ae ua ave ai le tuualalo a le faafeagaiga na ta’ita’i i le sauniga o le faalauiloa i Savaii, e ao i le ta’ita’i ma le pati ona toe silasila iai.
O le fesoasoani i le faaitiitia o le mativa ma fesoasoani i le tau o le soifuaga o se tasi o autū o tapenaga a lea pati faaupufai, o loo finau ai i ana faalauiloa mo le faatosina o tagata palota, i le faamoemoe e toe to atu le faatuatuaga latou te toe see ane ai e faafoe le pulega o le malo.
