O le a toe tatala le malaevaalele i Fagalii i fuafuaga a le faigamalo ua iai nei, i le faamoemoe o le Malo e toe faaaogā auaunaga tau pisinisi i le itumalo o le Vaimauga sa selesele i seleni maua a o tatala lea malaevaalele, lea ua lē toe faaaogāina i le taimi nei ae ua faagaioia ai se vaega o le auaunaga a le Matagaluega o Leoleo i le vaega o taavaleafi.

Na faailoa lea fuafuaga e le afioga i le Minisita o Galuega tetele ma Fela’ua’iga  ina ua saunoa e tali i fesili a sui faipule na afea lea matagaluega ia latou saunoaga faalauaitele o le tala autu o le Tupe. O se tasi o nofoa faaopoopo o tamaitai i le Palemene mai le itumalo o Aleipata Itupa i Lalo le afioga Faagasealii Sapoa Feagia’i sa ia toe ave le tuualalo i le Malo e silasila i le tāua o le malaevaalele fou i Ti’avea lea e lei faaaogāina talu ona fausia. 

OIo Fiti Vaai: “Sa iai lava le faanoanoaga foi lea, ona o le tulaga o mana’oga ma nisi o mea e faamanuiaina ai tagata lautele ina ua toe aveesea Fagalii. O le mea muamua lava, o le aafia ia o tatou turisi mai Tutuila. Telē a le aafiaga o turisi na i le faafaigofieina o femalagaa’iga. Manatua foi o lea ou te manatua, toetiti a o weekends uma, e aga’i mai ai le autaaalo tapolo a nai toeiinai i Tutuila e tapolo i Fagalii. Uma toe feosofi i le vaa toe o i Tutuila. Ua misi ia tatou na tupe e tele sa maua i Fagalii. O le isi vaega o le aufaipisinisi foi a tatou e malaga i Tutuila ia latou pisinisi ia ma le feoa’iga lea i le va o tatou ma Savaii i Asau. Tasi na vaega ua misi ai le tele o tupe mai le taimi lea sa faatino ai le malaevaalele i Ti’avea. Ae o le pito sili a ona aafia, aafia le itumalo. Aafia le itumalo o Vaimauga atoa, ia latou pisinisi sa fai i lena taimi. I fale’aiga sa faafaigaluegaina ai foi le mamalu o le tatou atunuu i Vaimauga atoa e lalata iinā, ua lē toe maua ai ni galuega. O fale’aiga, o kamupani taxis ma mea faapena, ua matua’i tapuni atoa ona o le lape o le faai’uga lena. Ia ma ou te talanoa atu ma lo’u agaga faaaloalo, e toe tatala Fagalii lau afioga i le sui mamalu o Vaimauga.” 

Ua faailoa foi e le Minisita o Galuega tetele le tofa Olo Afoa Fiti Vaai i lana saunoaga tali, o le vaa laupasese fou o le a taunuu i le masina o Setema e sui a’i le Lady Naomi o loo faia malaga i le va o Samoa e lua, o le a lē faaaogāina le igoa o le Lady Samoa, ae o le a faatumau pea ona faaigoa o le Lady Naomi 60 e faamanatu ai le onosefulu tausaga o le tutoatasi.