Ua toe faaauau i le vaiaso nei faalauiloa a le vaega faaupufai o le Faatuatua i le Atua Samoa ua Tasi i le motu o Savaii ma ua savali ai nei le lua vaiaso o iai i Salafai le ta’ita’i ma sui faatutū o lea vaega faaupufai mo ana faatosina o le palota tele.
O lea foi ua taunuu i Savaii le ta’ita’i ma sui faatutū o le vaega faaupufai e puipuia aiā tatau a tagata mo lana faalauiloa e pei ona faatulaga e amata i Faasaleleaga 2 ma faasolo atu i itumalo palota o Gagaemauga ma Gagaifomauga, Falealupo, Salega ma Palauli ae taualuga i le Aso Faraile nei i le itumalo o Faasaleleaga 1 ma toe taliu mai ai i Upolu.
O loo iai foi le fuafuaga a le vaega faaupufai o le Faatuatua i le Atua Samoa ua Tasi e mae’a loa le vaiaso lenei i Savaii ona taliu mai lea mo ana faalauiloa i itumalo palota uma i Upolu.
O le vaega faaupufai o le Samoa ua Potopoto o loo tapena foi lana faalauiloa i Savaii lea o le a faailoa ai foi ma lana anavatau.
