O le faitauga aloa’ia o le faigāpalota a le atunuu o loo faagasolo ua suia ai le faai’uga a le itumalo o Safata 2, lea sa molimauina e lima palota na tulaga muamua ai le sui tauva o le Faatuatua i le Atua Samoa ua Tasi i le faitauga muamua e le’i aloa’ia poo le provisional count, ae tulaga lua le sui tauva o le vaega e puipuia aiā tatau a tagata.
O le mae’a o le faitauga aloa’ia ma toe faasa’o nisi o faamaumauga a le ofisa o faigāpalota lea sa mafua ai ona aveesea uma mai le laupapa i le taeao o le Aso Gafua, faamaumauga o palota a Safata 2 talu mai le Aso Faraile ua mavae ina ua tapunia falepalota, na tula’i mai ai ua tulaga muamua palota a le afioga Tuia Pu’a Fuatogi Paepae Letoa e 650, ae tulaga lua ai palota e 628 ua maua e le sui tauva o le Faatuatua i le Atua Samoa ua Tasi le tofa Tupa’i Saimasi John Mathes.
Nisi o sui faipule ua faamaonia le manumālō mai i nofoa o latou itumalo ina ua mae’a le faitauga muamua o palota
O lē sa umia le nofoa o se minisita o le Kapeneta o le malo tausi le afioga Laumatiamanu Ringo Purcell e 287 palota na ia maua ma o le sui tauva o le Samoa ua Potopoto.
O le sui tauva tama’ita’i o le patī o le Samoa Labour Party na tauva i Safata 2 le afioga Toleafoa Losalia Sagalala Niumata ua ia maua le aofa’iga e 28 palota.
O le faitauga aloa’ia lea na faitau ai palota muamua ma palota faapitoa mo lea itumalo.
O nisi o faai’uga ua aloa’ia nei i le faitauga aloa’ia, o le itumalo o Aana Alofi 2 ua filifilia mai ai le susuga Aiono Alec Ekeroma sa tauva i le vaega faaupufai o le Faatuatua i le Atua Samoa ua Tasi.
E 547 palota ua manumālō ai lea sui tauva, pito iai palota na maua e le susuga Aiono Tile Gafa sa tauaveina le nofoa o lea itumalo e 473 ana palota, tulaga tolu palota e 109 ua maua e le isi suitauva o le Faatuatua i le Atua Samoa ua Tasi le tofa Ape Leulumoega Sofara, ae tulaga fā ai le sui tauva tuto’atasi le susuga Aiono Tuala Meapelo Frost e 78 palota ua ia maua.
O le sui tauva ua manumālō i le nofoa o Aana 2 sa avea ma Faatonu Sili aoao o le Soifua Mālōlōina ae na faamavae ina ua filifili e tauva i le faigāpalota tele a Samoa aoao.
I le tasi o faai’uga ua aloa’ia nei o le taunuuga o le filifiliga a Faleata 4 lea ua toe manumālō ai le tofa i le Igoamatua Ale Vena Ale o le sui tauva o le vaega faaupufai o le Faatuatua i le Atua Samoa ua Tasi e 1,226 palota ua ia maua, pito iai le sui sa tauva mo le vaega e puipuia aiā tatau a tagata le afioga Pepe Christian Fruean e 672 palota ua maua, tulaga tolu ai palota e 149 na maua e le sui tauva o le Samoa ua Potopoto le afioga Mapu Tafaigāta Toilolo.
I le aulia ai o lenei Aso Lua i Samoa o nisi o itumalo palota ua mae’a foi le faitauga aloa’ia o Vaisigano 2 ua manumālō mai ai le sui tauva tuto’atasi le tofa Motuopuaa Seve Henney Afereti Papalii ua ia maua palota e 409, tulaga lua ai le sui tauva o le Faatuatua i le Atua Samoa ua tasi le afioga Tagaloa Leilua Tupou Afa e 193 palota ua ia maua, tulaga tolu o le isi sui tauva o le Faatuatua i le Atua Samoa ua tasi o Su’a Lesā Faavae Lilo palota ua ia maua e 166, tulaga fā le sui tauva o le Samoa ua Potopoto sa seei i le tofi o lea itumalo ae o se minisita o le malo tausi le afioga Valasi Luapitofanua Toogamaga Tafito Selesele e 135 palota, tulaga lima ai le sui sa tauva mo le vaega e puipuia aiā tatau a tagata o Alopopo Siafausa Matafeo e 76 ana palota.
I Vaimauga 2 ua aloa’ia nei i le faitauga mulimuli ua aloa’ia le toe tula’i o le tofa Lenata’i Victor Tamapua i le nofoa o le itumalo i le aofa’iga o palota ua ia maua e 1,341, o le sui tauva o le Faatuatua i le Atua Samoa ua tasi ua pito iai le afioga Tamaletā Taimang Jensen e 886 palota ua ia maua, ae o le sui tama’ita’i sa tauva faatuto’atasi i le nofoa o Vaimauga 2 le afioga Niuafolau Fauolegogo Pātū Tanielu e 87 palota.
O le nofoa o le itumalo o Palauli 3 i le faitauga aloa’ia ua filifilia ai nei le sui tauva o le Faatuatua i le Atua Samoa ua tasi le afioga Aiolupotea Misa Tony Aiolupo ua ia maua le aofa’iga o palota e 811.
Pito atu iai palota e 505 ua maua e le sui tauva o le vaega e puipuia aiā tatau a tagata le tofa Leituala Benhur Talavou Matalavea, ae o le sui sa seei i le tofi sa tauva i le fu’a a le Samoa ua Potopoto le tofa Lagaaia Ti’aitu’au Tufuga ua maua palota e 75.
Mo le filifiliga a le itumalo o le Vaimauga 4 ua aloa’ia nei le filifilia o le afioga Lima Graeme Tualaulelei sa tauva i le fu’a a le patī faaupufai e puipuia aiā tatau a tagata, aofa’iga o palota ua ia maua 1,137.
Tulaga lua palota e 949 ua maua e le sui tauva tama’ita’i o le Faatuatua i le Atua Samoa ua tasi le afioga Tonuu Fuāmoli Amituanai Misi.
O le sui tauva tuto’atasi le susuga Vaea Ivana Eli ua ia maua palota e 322, pito iai palota e 173 ua maua e le sui sa seei i le tofi o Vaimauga 4 o se tasi foi o minisita o le malo tausi le afioga Faualo Harry Jeffrey Schuster, ma palota e 21 na maua e le sui tauva o le vaega faaupufai o le Samoa Labour le afioga Faaolesa Katopau Ainuu, o se tamalii sa seei foi i le nofoa o le itumalo i ni paeaiga ua tuana’i.
I le faitauga aloa’ia a le itumalo o Faleata 3 ua toe filifilia ai le tofa Lealailepule Rimoni Aiafi i le aofa’iga o palota ua manumālō ai e 1,476 ae tulaga lua palota e 1,092 ua maua e le sui tauva o le Faatuatua i le Atua Samoa ua tasi le tofa Paloa Louis Stowers.
O Vaimauga 1 ua faamautū i le faitauga aloa’ia le manumālō o le sui tauva o le Faatuatua i le Atua Samoa ua tasi le afioga Pauga Te’omatavu’i Talalelei Pauga ua ia maua palota e 1,231, o le sui sa seei i le nofoa o le itumalo le afioga Sulamanaia Tuliaupupu Fetaiai Tauiliili Tuivasa o le sui tauva o le patī e puipuia aiā tatau a tagata na ia maua palota e 1,096.
O le sui sa tauva mo le vaega faaupufai o le Samoa ua Potopoto le afioga Fataalii Tofele Milovale e 786 palota ua ia maua, ma le sui tauva tuto’atasi o Safa’i Iosua Selesele ua ia maua palota e 546.
O Vaimauga 3 ua aloa’ia le filifilia o le sui tauva o le vaega e puipuia aiā tatau a tagata le afioga Taioaliiseu Fiti Aimaasu, o palota ua manumālō ai e 1,465.
O lē sa seei i le tofi o se minisita o le malo tausi le afioga Lautimuia Afoa Uelese Vaai o loo tulaga lua i le filifiliga a lea itumalo i le aofa’iga e 1,339 palota ua ia maua.
O le sui tauva o le Faatuatua i le Atua Samoa ua Tasi ua pito iai le susuga Nonu La’ulu William Maui’a e 1,096 palota ua ia maua, ma le sui tauva tuto’atasi le afioga Siligatusa Alosina Ropati ua ia maua palota e 105.
O le asō e tatau ona maua ai le taunuuga o le faitauga aloa’ia mo nisi itumalo ua mae’a ma faamautū le aofa’iga o palota ua maua e o latou sui tauva.
