O le Aso Gafua o lenei vaiaso na amata su’esu’e ai i le Faamasinoga Maualuga i Mulinuu moliaga e lua o le faia o se auala solitulafono na saini faamalosi ai le suafa o se leoleo sinia i le faamoemoe e faamaonia ai se nonogatupe e silia i le $235,000 afe tālā i le faalapotopotoga o le faaputugatupe o le lumana’i manuia o tagata le NPF.
O Visesio Anthony Sitanisilao o loo ia teena moliaga e lua o le forgery, ma o se tasi sa galue o se leoleo o le malo i le taimi na talosaga ai le la nonogatupe ma lona to’alua, ma ia tāpā ai le avea o Nanai Vani Vai ma se tasi e faamaonia lana nonogatupe.
Peita’i o le molimau a lē na tagi sa ia matuā teena ai lona saini i pepa e avea ai ma se tagata e faamaonia le aitalafu.
Na faaalia i le molimau a Nanai o ia sa malaga i fafo i se taimi o le tausaga e 2022 i ni fonotaga faalemalo ma lē sa avea ma Palemia auā o ia sa ta’ita’i i le vaega o leoleo sa feagai ma le vaaia o le saogalemu o le Palemia i lea taimi.
Sa tuuina atu ai e le itu a leoleo le faamaoniga o le toesea o le leoleo sinia ma le atunuu i se pepa o loo faailoa ai aso ma le masina o lea faigāmalaga.
Sa ioe lē na faauluina le tagi i lana molimau sa tāpā lana fesoasoani e lē ua molia mo le faamaonia o le aitalafu peita’i sa fautua iai e faatali se’i foi mai i le malaga ona faatino lea o tulaga uma mo le saini o lona suafa o se tasi e faamaonia le nonogatupe.
Peita’i sa faailoa e le molimau na te’i ina ua foi mai ae siaki atu ana faamaumauga o ana saofaga ma aitalafu i le NPF o loo faailoa ai le aofa’iga o le nonogatupe ma le avea o ia o se tasi ua uma ona saini e avea o se guarantor poo le tagata e faamaonia.
E to’atolu isi tagata na saini latou te faamaonia le nonogatupe.
E tolu molimau a leoleo ae lua molimau a le itu a lē o loo molia o loo su’esu’eina.
