Ua amata faasolo nei su’esu’ega a leoleo i le tele o uaea eletise i totonu o Kalaiesitete ua aveesea e tagata o kopa o loo fesoasoani i le malutia ai o le to’atele mai le ono aafia i uaea ola o le eletise. 

Ua faamaonia e leoleo, o loo iai tagata o loo faaleagaina vaega nei ma ave faagaoi ai kopa, ma o se tulaga ua alia’e ai ma popolega mo le saogalemu o le lautele.

Ta’ua i lipoti mai leoleo, na amata vaaia le faaleagaina e tagata o laina eletise ma ave faagaoi kopa i nai masina ua tuana’i.

Ma ua tele ai foi ina faalavelaveina i le tele o faaitu, i le motusia ai o le eletise i le tele o faaitu o le taulaga o Kalaiesitete. 

Faaalia e le alii Satini, o ia foi o se leoleo su’esu’e faapitoa foi ia Sergeant Steph Trengrove, o le vaega o le Tactical Crime Unit a le Matāgaluega o Leoleo i Kalaiesitete, ua matua’i tele lava aafiaga i nei gaioiga i le motusia faafuase’i o le eletise i le tele o auaunaga moomia, essential services, i le faatautaia o a latou pitolaau ae ua lē mafai ona faatino talu ai le motusia faafuase’i o le eletise talu ai ni faiga faalētatau. 

O le tele o gaioiga o loo maitauina ai le faia i faaitu o McLeans Island, West Melton, Dallington, Avondale, Brooklands ma Spencerville o itu o loo faapea ona iai le tele o atina’e tau i le eletise. 

Faamaonia o le tele o matāupu, o loo maua atu ai le uaea eletise poo cables ua aveese kopa ae tuu na o uaea ola; ma ua avea ma popolega i le ono aafia pe sipaka ai se tasi ma fano ai se ola, pe afai ae faaauau ai pea gaioiga nei. 

Ua fautuaina ai le mamalu lautele ina ia mataala i taimi uma ma ia mata’itū lelei laina ma uaea eletise ma ua talosagaina malosi foi ina ia aua ne’i latalata iai se isi pe tago foi iai. 

E lē o iai se matāupu ua oo atu i le aafia ai o se tasi ae ua lapata’ia e leoleo tulaga i le ono iai o nisi e aafia pe a faaauau ai pea le faia e ia tagata o nei gaioiga. 

Ua talosagaina ai foi le fesoasoani a le mamalu lautele, ina ia faafesoota’i atu lo latou ofisa mo ni faamatalaga e tusa ai ma lea matāupu.

Puna o Faamatalaga: https://www.stuff.co.nz/nz-news/360781982/police-investigating-copper-thefts-say-live-wires-being-left-dangerously-exposed-powerlines