Ua faasala nei i le to’ese se alii faia’oga e igoa ia Timothy Fisher mo le 4 tausaga ma le 5 masina, i lona faia o ni amioga matagā faasaga i ni fanau teine ma lona faia ai o ni ata pu’e o loo faaalia ai ni sauāga matagā i fanauiti, a o galue ai o ia i le EduExperts, o se faalapotopotoga tau a’oa’oga mo fanau, e tauala mai i le Crimson Consulting.
Ta’ua i lipoti o le alii o Fisher sa lesitala i le auaunaga talu mai le tausaga e 2011 ma e lata i le 5 a’oga a le malo sa galue ai lenei alii, ma na maitauina sa iai ni faitioga faasaga i lea alii i le tausaga e 2021 talu ai ni tū ma ni aga lē taualoa, ae faapea o se matāupu e le’i moomia ona ave e soalaupule e le pulega o a’oa’oga.
Ua faamauina i lipoti, na faatino iloiloga maumaututū a leoleo e tusa ai ma lenei tagata mai le tausaga e 2011-2017, e aofia ai ma se faailoga mūmū e lapata’i ai auaunaga ma faalapotopotoga e lē tatau ai ona iai faatasi lea tagata ma fanau e aunoa ma le mata’itūina lelei o ia.
Ae peitai, i le tausaga e 2015, na faamauina ai le toe aveese o lea lapata’iga ae toe faafou lana tusi faamaonia poo le certificate mo le tausaga e 2016 e faaauau ai lana faia’oga.
Ua faamālūlū ai nei le Teaching Council i le to’atele o i latou na aafia aemaise o aiga o loo iai fanau i lalo o le vaavaaiga a lenei auaunaga mo a’oa’oga.
Ma ua o latou faatino foi su’esu’ega i tulaga ua lē mafai ona malupuipuia ai fanau i lalo o le auaunaga ma le faalapotopotoga.
Puna o Faamatalaga: https://www.nzherald.co.nz/nz/teaching-council-launches-investigation-after-man-with-prior-convictions-passed-police-vets-abused-girls/WP7V3WMMLBE3VBR2NMJP6YQHHU/?lid=npfdziyp9xjv
