Ua aloaia ma ua suaina le eleele mo se tasi o galuega a le vaega o puipuiga poo le Defence Force e tusa ai ma le fausia lea o ni fale mo aiga a i latou o loo galulue i lalo o lenei auaunaga.
I se pepa o faamatalaga mai le Vaega o Puipuiga, na faamanino ai- o lenei faamoemoe o se galuega aupito i telē lea talu mai le tausaga 1980.
O le Aso Lua o lenei vaiaso sa faatino ai se sauniga e aloaia ai le amata faatautaia o galuega mo lea fuafuaga.
O sui o le Vaega o Puipuiga ma paaga uma o loo galulue faatasi mo lenei galuega na suaina le palapala poo le eleele e fai ma pine o lea faamoemoe ua faaigoaina o le Linton Homes for Families project.
E $600 miliona le tau o lenei galuega ma o le a suia ai le tele o fale tuai a nai tagata militeri ma le puipuiga ua au tausagā e lei toe faaleleia.
Faamauina o lenei faamoemoe o le a maua ai ni fale fou e 8 i Linton, 5 fale i Bulls mo le Royal New Zealand Air Force i Ohakea, 10 i Burnham Camp i Canterbury, ma le 61 i totonu o Aukilani – le Bayswater e pei ona fausia e ala i se faigapaaga ma le Ngāti Whātua Ōrākei.
Faamanino foi i faamatalaga e 50 fale o loo foufou e fausia mo le itu o Waiouru, ma le tele o isi galuega ma atina’e o fale i lenei tausaga.
Ta’ua o taumafaiga nei e tali atu i tulaga faalētonu ua iai nei fale o loo aumau ai nai tagata o loo tautuaina le malo e ala i lenei auaunaga.
Puna o Faamatalaga: https://nzdf.mil.nz/media-centre/news/government-turns-the-sod-on-ground-breaking-defence-housing-plan/
