Ua faamaonia mai nei e le Iuni o Galuega a le Malo, e silia ma le to’a afelimaselau tagata galulue o le Matāgaluega o A’oga o le a aga’i ese mai a latou galuega faatino o le asō mo le na o le tasi le itula e faatino ai sa latou solotetee i le malo ona o se fuafuaga ua faailo mai i le taofia ai o siitaga i o latou totogi.
O le asō lea ua faamauina e faatino ai lea solotetee i le atunuu, ma ua faaalia e le Asosi o Auaunaga Lautele, o se taimi muamua lea i totonu o le 20 tausaga ua molimauina ai le faatino e tagata galulue o le Matāgaluega o A’oga o se solotetee.
Na ta’ua e le sui o le Asosi o Auaunaga Lautele a lea Matāgaluega, ua lilifa tagata faigaluega i lea itu, ona e manatu e lē o amana’ia e le malo so latou taumafai atu, e lē o taga’i foi i le faafitauli o le taugatā o le soifuaga o loo fetaia’i ma i latou ma o latou aiga, a o lenei o le a taofi le vaega tonu e ono fesoasoani tele ia i latou mo le isi lua tausaga.
Na faamanino e le asosi, o le to’atele o sui e lē ono maua ni siitaga mai le fuafuaga fou ma ua faailoa foi fuafuaga o le ono vāea ai o le to’atele mai le Matāgaluega o A’oga, i faatalanoaga ua amata faatino nei ma e faapea o le a taumafai e galulue i alaga’oa poo seleni o loo iai i le taimi nei.
Ua ta’ua e le to’atele ma le asosi, o loo logonoa pea le faauluuluga o le Matāgaluega talu mai lava ona amata faatalanoaina lea matāupu ia Tesema o le tausaga na se’i mavae atu nei.
Ae ua faailo e le sui ta’ita’i poo le sui faauluuluga ia Rob Campell o loo latou lagonaina faatasi ma tagata faigaluega uma le faigatā o loo feagai ai nei, ma o loo ia te ia le agaga o le lagolagoina o vaega e tatau ona faatino e le ‘aufaigaluega mo se tasi i lenei matāupu, ae o loo iai foi lona faatuatuaga ina ia soalaupule ma fetuuna’i lelei vaega ina ia faamalieina itu e lua.
Puna o Faamatalaga: https://www.rnz.co.nz/news/national/561604/over-1500-to-strike-over-ministry-of-education-s-proposed-pay-freeze
