O le aso ananafi na tuuina atu ai la tatou lipoti i le tālia ai o le i’uga a le Faamasinoga Faaitumalo a Aukilani e tusa ma le matāupu a le alii o Caleb Clarke i le moliaga o le ‘avetaavale mata’utia.
Ae i le afiafi o le aso ananafi na māua ai le lē faasala ai o le alii taalo lakapi, ae ua solofua le moliaga na faia faasaga ia te ia; peita’i ua tapu ona toe tago le alii i le foeuli mo le 12 masina, se’ia aulia le aso 21 o Iuni 2026.
E tusa ai ma lipoti mai le leitio faavaomalo a Niu Sila (RNZ), na molimauina le tutulu o Caleb Clake ina ua tolaulau le faai’uga a le faamasinoga.
Faailoa e le faamasino, e telē lava le aafiaga i le alii ma ana taumafaiga i le taaloga lakapi pe a na faasala ma e iai lonatalitonuga e itiiti lava se avnoa e toe solia ai e Caleb le tulafono, ma o le ala lea i lona manatu e talafeagai ai le tatala pea o le alii i tua e aunoa ma se faasalaga.
Na faaalia e le itu a leoleo le lē talafeagai o lea faai’uga, ma na o latou faaalia, e lē o se faata’ita’iga lelei lea mo le to’atele aemaise lava se tagata e pei o Caleb, o sē e iloga i le taaloga lakapi ae mafai ona ‘alofia faasalaga, ma ua latou fesiligia ai le tonu, ma alia’e ai i lo latou manatu, afai ae mafai ona solofua le moliaga a lenei alii, o lona uiga ua ta’u mai i le lautele le mafai ona savali o se isi e aunoa ma le faasalaina i le tulafono.
Puna o Faamatalaga: https://www.rnz.co.nz/news/national/564898/all-black-caleb-clarke-discharged-without-conviction-for-dangerous-driving
