Ua faalauiloa mai faalapata’iga e le to’atele o tagata e ona fale fou sa tatau ona fausia, se kamupani faufale na totogi iai le faitau fia afe tālā, ae o lea ua maua le tala ua ninimo le faatonu sili o lenei kamupani faufale.
O loo ta’ua i se lipoti a le Radio New Zealand le talanoa atu i ni tagata se to’aono sa faatulaga e fausia o latou fale e le kamupani a le Enzed Construction, ma latou ta’ua ai le gau o a latou tupe na totogi atu i lenei kamupani, ona o le leaga o le faiga o galuega ae o nisi ua matuā lē faia lava galuega ae ua uma ona totogi tupe.
I ni faamaumauga na faailoa ane i le RNZ o loo faaalia ai e silia ma le $60,000 tālā se tupe na totogi atu i le Enzed Construction ma lona faatonu le alii o Hemi Arapeta Tiopira, e iloa tele i lona suafa o James.
O ni matāupu sa feutaga’i ai ma le kamupani i le amataga o le tausaga nei, i Ueligitone, Lower Hutt ma Waipukurau, na oo ai ni lipoti i leoleo, o moliaga i le Dispute Tribunal, ma le tele o nisi o faaseā sa aga’i i luga o le itulau i le initaneti a le Enzed Construction.
E tele taimi sa taumafai ai le RNZ e sa’ili se tali mai a le alii faatonu o le kamupani faufale e tusa ai o faaseā a le to’atele o tagata, peitai e leai se tali na tuu ane.
Faaleo lagona faanoanoa o nai nei tagata ua lusi le tele o a latou tupe i nei ituaiga o kamupani lē faamaoni, aemaise e lē o mautinoa pe iai se faamoemoe e toe maua mai uma a latou seleni ua gau pe afai ua lē mafai ona toe foi mai le Enzed Construction e faamae’a a latou galuega ua uma ona totogi iai tupe.
Puna o Faamatalaga: https://www.rnz.co.nz/news/national/571047/it-really-ruined-me-builder-takes-thousands-of-dollars-then-vanishes
