Ua faai’uina polokalame o le 100 tausaga o le kalapu lakapi a le afio’aga o Moataa i le sa’iliga o le siamupini o le taamilosaga lakapi ta’ito’afitu sa faagasolo i le malae o le Apia Park i le Aso Faraile ma le Aso Toonai na te’a nei.
Ua sola ai nei le ‘au a le Laumua o Tumua mai Afega ma le ipu o le siamupini ma le faailogatupe e $10,0000 tala.
O le Laumua o Tumua na sa’ilia le siamupini o le taamilosaga lakapi ta’ito’afitu ma le ‘au malosi o le Liona mai le afio’aga o Laulii ma o le faai’uga na manumālō le Laumua o Tumua i le 32 ‘ai i le 14 a Laulii.
O se taamilosaga sa tausinio ai ‘au e 24 e aofia ai ‘au e lua mai fafo i Hawaii ma Aukilani i Niu Sila, ae sa auai foi ma le ‘au a alii e logonoa.
O se isi lea o sao o le kalapu lakapi a Moataa i le faailogaina o le selau tausaga o le lakapi i le afio’aga, ua fesoasoani ai e siitia le atina’e o le lakapi mo alo ma fanau a Samoa e logonoa.
O le fiafia tele sa faia i le fale taalo o le taaloga soka i le Apia Park na taualuga iai le selau tausaga lea sa tauaao ai ma faailoga e amana’ia ai nisi o tama sa taaalo i le kalapu aemaise o alo o le afio’aga sa faafailele le olaga lakapi mai totonu o le kalapu.
