Ua sola le autalavou a le Ekalesia Faapotopotoga Kerisiano Samoa i le afioaga o Vavau ma le siamupini o le finauga poo se debate sa faagasolo mo le tolu aso, e faatatau i ni autū sa avea ma manulauti o le faamanatuina o le aso o Tupulaga o le lalolagi i Samoa.

E fitu autalavou sa mafai ona auai i le finauga lenei sa faaali ai lagona o tupulaga i mataupu e autū i le puipuiga malu o le soifua mālōlōina lelei o tupulaga pe a aafia a latou aiātatau i ni faaletonu e tutupu ma aliali mai, i sootaga tau feusua’iga poo le sexual reproductive health rights.

O se tasi o autū sa aga’i iai finauga o sauaga tau i ituaiga o tagata le gender based violence.

O autalavou a le EFKS a Lalomauga, EFKS Vavau, EFKS a Falesiu, autalavou Metotisi mai Salamumutai, o le polokalame o le Teen challenge, EFKS a Ululoloa ma Siusega ma le autalavou EFKS mai Apolimatai sa auai i le faamoemoe lenei sa faagasolo i le faletalimalo o le Taumeasina Island Resort.

O le manumalo ai o le autalavou EFKS a Vavau i le finauga, ua maua ai e le autalavou a le EFKS a Lalomauga le tulaga o le autalavou sili ona maualuga lona sao i le finauga o manatu faaalia o tupulaga sa auai.Sa tapenaina lenei polokalame e le faalapotopotoga o aiga soifua manuia o Samoa, ma le ofisa o le Malo Ausetalia i Samoa.