Ua faamaonia ma tuuina mai e le Ofisa o Faamaumauga a Niu Sila numera o tagatānuu Aotearoa ua malaga ese atu ma le atunuu ae aga’i i Ausetalia e aumau ai.
Ma ua faailoa mai i totonu o le tausaga e tasi e pei ona faaalia i faamaumauga mo le tausaga e 2024, e 30,000 le numera o tagata ua tuua Aotearoa nei mo Ausetalia.
Ta’ua e le sooupu a le Ofisa o Faamaumauga ia Sarah Drake, e tai tutusa lelei ia faamaumauga ma le numera o tagata na tuua le atunuu i le tausaga 2023, e pei ona faamauina e 29,400 tagatānuu na aga’i ese ma Niu Sila i lea vaitau.
Ua faamaonia mai e le ofisa, o le tausaga e 2024, o le tausaga sili lea ona maualuga numera o ē ua aga’i ese i totonu o le kalena faaletausaga talu mai le tausaga e 2012.
Ua faailoa e le Stats NZ o le ata lava lea e tasi na vaaia e le ofisa le tula’i mai, mai le tausaga e 2004 ma le 2013, ae o le numera lava lea e 30,000 o tagata e malaga atu mo Ausetalia.
Na vaaia le pa’ū o lea numera i le na o le 3,000 i le va o le tausaga 2014 ma le 2019.
Ta’ua e Sarah Drake, e pei o Ausetalia lava le atunuu o loo aga’i atu ai le to’atele mai Niu Sila nei, e pei ona ia faamanino o le 58% mai le 69,300 o tagata e aga’i sa’o atu mo Ausetalia.
Ua faailoa e Sarah talu mai le amataga o le tausaga e 2000 o le to’atele o tagata na fananau ma ola a’e i atunuu i fafo ua aumau i Niu Sila ae o le to’atele o tagata Niu Sila lava ia ua tuua pe ua aga’i ese ma le atunuu mo Ausetalia.
I le tuu mai ai o nei faamaumauga e le’i manofonofo le vaega faaupufai o le Leipa, i le faaalia ai o o latou manatu e tusa ai ma lenei matāupu.
I se faaaliga e tauala mai i luga o upega tafa’ilagi a le vaega faaupufai, ua o latou upuia ai le ta’ita’i o le malo ia Christopher Luxon ma le malo i le lē mafai ai ona latou faatino ni fuafuaga lelei ina ia tuuitiitia ai le numera o tagata e aga’i ese mai le atunuu.
Ua tuua’ia e le vaega a le Leipa le maualuga tele o le soifuaga ua fetaia’i nei ma le to’atele o tagata.
Puna o Faamatalaga: https://www.1news.co.nz/2025/07/10/net-migration-loss-of-30000-from-nz-to-australia-in-a-year/
