Ua faaauau pea ona tuuina atu e le Minisita o Galuega Tetele ma Fela’ua’iga a le malo siaki tupe o dividends poo meaalofa o tufatufaga mai tupe mamā poo polofiti a faalapotopotoga tuma’oti a le malo o loo i le vaaiga a le minisita le tofa Olo Afoa Fiti Vaai.
O le Aso Faraile na te’a nei e lua faalapotopotoga o loo i le vaaiga a lea minisita le kamupani vaa a Samoa ma le faalapotopotoga o vaa a Samoa sa ia tauaao siaki tupe o ia tufatufaga i le Minisita o Faalapotopotoga Tuma’oti a le Malo.
O le faalapotopotoga o vaa le Samoa Shipping Corporation e tasi le miliona 325 afe ma le 4 selau limasefulutasi tālā le siaki o lana dividend i le malo, ae o le kamupani vaa a Samoa le Samoa Shipping Services e 180 afe 825 tala 57 sene.
Le Minisita o Faalapotopotoga Tuma’oti a le Malo le tofa Leatinuu Wayne Sooialo.
O le masina na te’a nei na faaoo atu ai foi i lea minisita tupe o tufatufaga mai tupe mama a le Pulega o Malae Vaalele ma le Pulega o Uafu ma Taulaga o nisi o auaunaga tuma’oti a le Malo o loo i le vaaiga a le Minisita o Galuega Tetele ma Felaua’iga a le Malo.
