O le avanoa mulimuli le vaiaso nei mo tagata palota e tatau ona faia ai a latou lesitala e pei ona faamalosia i aiaiga o le tulafono o faigāpalota e pei ona aiaia ai ma le faasalaga tupe e 2 afe tala pe a lē faia le lesitala ae ua agavaa e palota.
E oo mai i le taeao o le Aso Toonai na te’a nei ua ausia le 79 pasene o le aofa’iga e 117,225 o tagata ua agavaa e palota ua mae’a ona faia a latou lesitala.
O lea 79 pasene ua oo iai le maualuga o le lesitala, o se aofa’iga lea e tusa ma le 92,541 tagata palota.
E ui i ia faamaumauga lata mai i le ofisa o le komisi o faigāpalota peita’i ua faailoa e le ofisa o faigāpalota o le itumalo o Faasaleleaga 4 i Savaii ma Faleata 3 i Upolu o loo to’atele pea tagata e agavaa ona palota e le’i oo atu lava e lesitala.
O Faasaleleaga 4 e 289 e le’i faia ni lesitala a o Faleata 3 e 2,468.
O faamaumauga lata mai foi a le ofisa o le komisi o faigāpalota ua faamauina ai e tusa ma le 24,684 tagata agavaa mai itumalo e 51 e le’i lesitala.
O le Aso Tofi o le vaiaso nei e tapunia ai le lesitala o tagata palota, ae i faamaumauga lava talu mai le ta o le 8 o le taeao o le Aso Toonai na te’a nei, ua faamauina ua 13 itumalo ua silia i le selau pasene o latou tagata agavaa e palota ua lesitala, lea e sefulu i Savaii ae tolu i Upolu.
E 13 foi itumalo ua ausia le 90 pasene lea e 6 itumalo i Upolu ae 7 i Savaii.
E 12 itumalo ua ausia le 80 pasene, 4 itumalo ua silia i le 70 pasene o tagata palota ua lesitala, ono itumalo ua ausia le 60 pasene ma le tolu o itumalo ua silia i le 50 pasene o tagata agavaa ua lesitala.
