E leai se lola palota mo itumalo faapalota e 51 ua mae’a ona o loo iai isi tapenaga e mana’omia a o le’i ave e lolomi.
Ae o le tapunia ai i le Aso Tofi o le lesitala ua faailoa ai e le ofisa o le komisi mo faigāpalota, ua ausia le 87 pasene o le aofa’iga atoa o tagata e tatau ona lesitala e 117,225.
O lona uiga o le aofa’iga o tagata agavaa ua mae’a lesitala e 109 afe selau ivasefuluiva.
Mai lea aofa’iga ua tula’i mai ai e 15 afe ma le 26 tagata agavaa e tatau ona lesitala ma palota e le’i oo atu e faatino a latou lesitala.
I lea aofa’iga ua manino ai o tagata ia o le a feagai ma le faasalaga e lua afe tālā.
Peita’i e ono toe faaitiitia lea fuainumela ona ua faailoa e le Palemia o le malo tausi, o loo iai nisi tagata sa lesitala o loo iloilo e le ofisa o le komisi o faigāpalota nisi o vaega tāua ona faato’ā faamauina lea o o latou suafa i lola a itumalo o loo lesitala ai.
I le feiloa’iga ma tusitala i le Aso Tofi na faailoa ai e le Ta’ita’i o le malo tausi, ua i luma o le faamasinoga nisi o matāupu e faasino i ni gaioiga taufaasese ua faaaogā ai tusifolau o nisi tagata e lesitala ai ni tagata palota.
O loo iai foi ni matāupu faapea o loo tuua’ia ai le faaaogā o ni pepa fanau e faamaonia ai le lesitala o nisi tagata ae lē o latou e ana ia pepa fanau.
