O faafitauli sa molimauina e le Komesina o faigāpalota a o faagasolo le faigā filifiliga a le atunuu ua mae’a, ua silasila ai le afioga Toleafoa Tuiafelolo Alexander John Stamley i ni suiga e fo’ia ai le toe tutupu mai o ia faafitauli sa avea ma lape a o alo Samoa i lana palota tele.

O le feiloa’iga a tusitala ma le Komesina o faigāpalota sa ia faailoa ai mafua’aga o le tuai ona maua o le faai’uga muamua lea e iai nisi itumalo sa faato’ā maua le aofa’iga o palota mai falepalota e 4 i Savaii i le taeao o le Aso Toonai ina ua mae’a le faigā filifiliga i le Aso Faraile ua mavae.

O se tasi o galuega fitā sa feagai ma le Komesina o faigāpalota ma lona ofisa o le 430 o pusa palota faapitoa na silia ma le 24 itula o faitau ona o le tele.

O lea galuega ua silasila ai nei le komesina e tasi le falepalota mo palota faapitoa i itumalo e 51 o le atunuu.

O se suiga pe afai e faatino o le a laitiiti ai le numela o pusa palota faapitoa e faia iai le galuega o le faitau ma faavasega i itumalo a o le’i faitauina i le taimi o le faitauga aloa’ia. 

O le mae’a o le faigā filifiliga a le atunuu na molimauina ai le ootia o le Komesina o faigāpalota i sona finagalo ina ua fesiligia e tusitala e tusa ai ma le aotelega o le galuega sa feagai ma lona ofisa, aemaise o le 1,230 o tagata fai palota sa faafaigauega i lalo o le vaaiga a le ofisa o le komisi o faigāpalota.

Le afioga i le Komesina o faigāpalota afioga Toleafoa Tuiafelolo Alexander John Stanley.