Ua faailoa e le ofisa o le komisi o faigāpalota aso ua faatulaga e le faamasinoga mo nisi o tapenaga tāua o le palota tele i le masina o Aokuso, ae ua silasila le komesina o faigāpalota le afioga Toleafoa Tuiafelolo Alexander John Stanley, e sa’ili se isi finagalo o le faamasinoga mo nisi o tapenaga lava o le faigā filifiliga a le atunuu.
I le tulaga ua taoto mai ai le laulau o taimi atofaina e le faamasinoga poo le time table, faatulaga mai ai o le Aso Gafua a sau, 16 o Iuni e tuuina atu ai e le komesina le faasalalauga faalaua’itele mo le faauluina o sui faatutū, o le aso 27 o Iuni e faamuta ai le faauluina o ni faalavelave poo ni tetee faasaga i ni sui tauva, aso 4 o Iulai e tapunia ai lola palota, aso 7 i le aso 12 o Iulai o le piliota lea e faaulu ma lesitala ai sui faatutū, aso 5 o Iulai i le aso 16 o Aokuso o le piliota lea e tuuina atu ai talosaga ma tapunia ai foi talosaga mo le faia o le palota muamua le pre-polling, aso 14 o Aokuso i le tutonu o le la i le 12 i le aoauli e tapunia ai le avanoa e faaui ai i tua ni suafa o ni sui faatutū a o lumana’i le aso 29 o Aokuso ua atofaina mo le palota aoao a le atunuu.
O le aso muamua i le aso 5 o le masina o Setema o le piliota lea o le faitauga aloa’ia o le palota, aso 5 o Setema e faasalalau faalaua’itele ai e le Komesina o faigāpalota le faai’uga o le palota, ae Aso Gafua le aso 8 o Setema e faasilasila aloa’ia ai e le afioga i le Ao o le Malo le faai’uga aloa’ia o le faigāpalota.
O le tapenaga a le Komesina ua fuafua e toe sa’ili ai se finagalo o le Faamasinoga Maualuga ua ia fautuaina ai le aso 2 o Iulai e avea ma aso mulimuli e su’esu’eina ai ni faalavelave mai tagata palota poo voter objections, aso 18 o Iulai e avea ma aso mulimuli e faaulu ai ni talosaga tetee i ni agavaa o ni sui tauva, aso 25 o Iulai e avea ma aso e faaulu ai ni tali faasaga i ni talosaga tetee i ni sui tauva, ma le aso 15 o Aokuso e faailoa ai ni faai’uga a le faamasinoga i ni lu’i sa faaulu faasaga i le agavaa o ni sui faatutū.
Ua faailoa e le Komesina o le a faailoa lautele mo le silafia e le atunuu se finagalo o le faamasinoga i ia aso ua ia fautuaina.
