Ua molimauina i le faiga taulaga e ala i meaalofa tupe a le Vasega 4 o le Kolisi o Sagato Iosefo o le tausaga e 1988 ma Uso Malisi, faapea le kalapu o le Kaakia Mai Group, ua siitia pe faaopoopo lea foa’i mo tamaitai Sa Monike i Samoa ma Aukilani Niu Sila ma le nofoaga o le Mapuifagalele.

O le ta’ita’ifono o le vasega 4SJC88 le afioga Tuatagaloa Ming Leung Wai, o sui o le pulega o le kamupani o le PacificEzy ma le pule o le Moana Rentals sa latou molimoli i Mapuifagalele ma le nofoaga o Tamaitai Sa Monike i Vailima le foa’i ma le faiga taulaga o lenei tausaga, lea e 60 afe tala ua vaelua tutusa i le tausiga o tamā ma tinā matutua i Mapuifagalele ma le nofoaga o Tamaitai Sa Monike i Samoa.

O lona uiga e ta’i 30 afe tala ua maua e ia nofoaga e lua.

O Tamaitai Sa Monike i Aukilani e 35 afe tala Niu Sila poo se aofa’iga e 56 afe 350 tala Samoa.

O le tausaga na te’a nei e limasefulu afe tala le aofa’iga o lea faiga taulaga sa vaelua tutusa foi mo ia nofoaga e lua i Samoa.

O se vaiaso e le’i mamao tele atu sa faia ai le sa’iligatupe i Aukilani Niu Sila e ala i se posiva sa aoina mai ai i le mamalu o le tatou atunuu le mā’au e ala i tupe ua mafai ona faatino ai lea faiga taulaga o lenei tausaga, ma o se meaalofa foi o le Kerisimasi mo i latou ua autū iai lea faiga meaalofa.

O le sui o le pulega o le kamupani lafo tupe faamomoli le PacificEzy o loo avea ma lagolago autū i lenei faamoemoe na saunoa i le momoliina o le foa’i i Mapuifagalele, ae tali fuaitau foi iai se tasi o tamā o se matua tausi o loo faamautū ai i le nofoaga.

O saunoaga ma tuleiga i le faatinoina o le foa’i o le faiga taulaga mo Mapuifagalele ma le nofoaga o Tamaitai Sa Monike i Vailima.

O le afioga Peseta Tuala Faimalotoa Allan Stowers o le Pelesetene lea o le Vasega 4 a le Kolisi o Sagato Iosefo o le tausaga e 1988 ma Uso Malisi faapea le Kaakia Mai Group sa faamaopoopoina le sa’iliga seleni mo lea Faiga taulaga.