Ua faai’uina le taamilosaga kilikiti faasamoa o le Teuila o lenei tausaga i le siamupini ai o le ‘au o le Tanifa o le Vao mai le afioaga o Sili i Savaii i le vaega o ‘au a alii, ae o le Fetuao mai Ti’avea Aleipata i le vaega o ‘au a tamaitai.
E 6 afe tala le faailogatupe, o le Ipu ma le talita ua maua e le Tanifa o le Vao ma isi faailoga faaopoopo, ae 2 afe tala ma le Ipu ma isi faailoga faaopoopo ua maua e le ‘au o le Fetuao.
O le ‘au o le I’a o le Vai ma Tanugamanono sa o la sailia le siamupini i le vaega o tamaitai ma le ‘au o le Fetuao, ma sa maua foi faailoga tupe mo le ‘au ua tulaga lua.
E faapena foi i ‘au a alii ua tulaga lua le Ainiusami mai Matautu Lefaga.
O ‘au uma sa tausinio e pei o le aukilikiti a alii na masii mai le setete o Utah i Amerika na maua foi le faailoga.
Ua faailoa e le faatamā o le asosi kilikiti faasamoa le afioga i le Minisita o Faatoaga ma Faigafaiva, e iai ‘au mai fafo e pei o Amerika Samoa ua faailoa atu lo latou fia auai i le taamilosaga o le tausaga fou.
E 12 afe tala le meaalofa tupe a le malo na tuuina atu e fesoasoani ai i le taamilosaga kilikiti faasamoa o le Teuila o lenei tausaga.
I le taamilosaga lakapi o le King and Queen na taualuga iai lea selau tausaga o le lakapi i le afioaga o Apia, ua sola ma le aulakapi o le Apia Maroons le siamupini, ae tulaga lua le ‘au o le Tepatasi i le vaega o alii.
I le tausinioga o ‘au a tamaitai ua siamupini ai le ‘au o le No Idea, ae tulaga lua le ‘au a tamatai mai Salafai o le Savaii Queens.
E 12 afe tala le meaalofa a le malo sa tuuina atu mo lea taamilosaga na faai’uina i le faai’uga o le vaiaso na te’a nei.
