Ua fautuaina le failautusi o le ofisa o le fono aoao faitulafono i le taunuuga o se su’esu’ega a le ofisa o le Komesina o Sulufa’iga, ina ia ave le avanoa e faamavae lelei ai le tama’ita’i o Taikerise Moe ina ia agavaa ai i faamanuiaga e tatau ona ia maua mai lana tautua i lea ofisa o le malo e 34 tausaga o auauna ma galue ai.

O se tasi o fautuaga ia tuuina atu le faamanuiaga o tupe totogi mo lea tinā e amata mai ia Iuni o le tausaga na te’a nei na faamuta ai lana galuega se’ia oo ia Tesema o le tausaga lava ua mavae.

O le isi o fautuaga i le failautusi o le fono, e talafeagai se faatoesega i le tama’ita’i faigaluega e fua i le tele o tausaga o lana auaunaga.

O nisi ia o fautuaga a le ofisa o le Komesina o Sulufa’iga i se tusi ua logoina ai le failautusi o le ofisa o le fono aoao faitulafono e tusa o le faai’uga ua taunuu iai a latou su’esu’ega i le faaseā na tuuina atu e Taikerise, ma ua faamaonia ai e sesē ma lē sa’o mafua’aga o le faai’uga na faamuta ai lana tautua.

O se lipoti i le tausaga na te’a nei i lea matāupu na faaalia ai e le Sui Komesina o Sulufa’iga le afioga Maualaivao Pepe Seiuli ua faamavae, e leai se malosi’aga tele o le ofisa e faamalosia ai se auaunaga a le malo e usita’ia ni fautuaga mai se latou su’esu’ega, peita’i e mafai ona latou tusi i le minisita e fitoitonu i se auaunaga a le malo e ala atu ai se faaseā.

O le taunuuga o su’esu’ega i le faaseā a le tama’ita’i sa galue i le ofisa o le fono ua tuuina atu i le failautusi o le ofisa o le fono le afioga Satama Leatisa Uitime Tala ma le Fofoga Fetalai le susuga Papalii Lio Oloipola Ta’eu Masipa’u.

Mo le silafia na mafua ona faamuta e le failautusi o le fono le galuega a lea tagata faigaluega ona o se faaseā na ia faia faasaga i le failautusi sa tuuina atu i le tama’ita’i Palemia e mafua i ni matāupu faalotoifale i le pulea o lea ofisa tāua o le Malo.