O le aso 30 o le masina o Tesema na te’a nei na ave ai se tusi mai le faafaletui o faipule o le vaega faaupufai o le Faatuatua i le Atua Samoa ua Tasi i lo latou ta’ita’i le afioga i le Palemia ma fofola iai mataupu eseese sa talanoaina.

O ia mataupu e faasino i atugaluga o sui faipule i le tofi minisita lagolago o le Faipule o Salega Tasi ua faamālōlō, o le lē auai atu  i nisi o fono o le ta’ita’i, ma le mataupu i moliaga a leoleo ua faamuta ai le tofiga minisita o le Faipule o Gagaifomauga 3.

O le tau faai’ui’uga o lea tusi o loo faailoa ai se tuua’iga o le lē amana’ia ma le manatu māmā o le ta’ita’i le afioga i le Palemia i sui faipule o le faafaletui, e mafua i le lē auai i le latou fono.

E lē gata i le ta’ita’i ae o nisi o nisi Minisita o le Kapeneta e le’i auai.

O le laina mulimuli o le tusi e faitauina faapenei, “O le finagalo autasi o sui auai o le fonotaga ua tatau nei ona sui le ta’ita’i o le vaega faaupufai, poo le Palemia na te ta’ita’ia le atunuu ona ua lē faatuatuaina oe, ona ua matou vaavaai atu ua foliga mai ua fai keni le tatou vaega faaupufai ae tausolomua mai i lo outou kapeneta”.

E 22 suafa o faipule o le faafaletui o loo iai i le tusi e ese mai ai le suafa o le failautusi o le pati faaupufai e lē o se faipule.

O ia foi suafa o loo aofia ai ni minisita se to’afā peitai e to’alua o loo saini, ae mai le 22 o faipule o iai suafa i le tusi e na o le to’asefuluiva o loo saini ai.

E lē o iai le suafa o le ta’ita’ifono o le faafaletui.