O le faai’uga o le vaiaso lenei e amata aloa’ia ai le ta’ita’i o le vaega faaupufai a le ACT ia David Seymour i le tulaga tofi o le Sui Palemia, sui ta’ita’i o Niu Sila, i le mae’a faamatuu atu e lē sa seei mai i lea tulaga tofi ia Winston Peters o vaegauma i le faatautaiga o matāfaioi o le avea ai ma Sui Palemia, poo le handover.
Mo le silafia, ua aga’i e faatino lea tulaga ona o se maliega i lalo o le malo soofaatasi o loo pale mai i le ta’ita’iga o le atunuu, poo le coalition government, e auaua’i vaega faaupufai a le NZ First ma le ACT i le faatauiga o lea matāfaioi tāua.
Ma o lea ua mae’a le taimi o le NZ First na ta’imua i lea maliega mo le 18 masina.
O le aso 31 o Me o loo fuafua e faatautō ai Seymour i le maota o le Kovana Sili.
Ma ua folafola nei e le ta’ita’i o le Act, vaega e aga’i tonu iai lana faamuamua, e pei o le faaauau ai pea talanoaga ma fuafuaga i le atia’e ai o tulaga o A’oa’oga, o tulafono e faatonutonufolau ai le tele o fuafuaga a le atunuu, o le soifua mālōlōina aemaise tulaga o le tamaoaiga o Niu Sila.
I le mae’a ai o le taimi o NZ First o lea ua faamauina le amata tapena ai o Winston Peters mo le isi faigāpalota.
E pei ona faasolo ai le tele o ana fuafuaga mo le aga’i atu i le faigāfilifiliga a le atunuu.
Ae ina ua fesiligia ona manatu e tusa ai ma lona taimi i le tofi o le Sui Palemia, na ia faamanino ai, o se faaaloalo lea moia, aemaise o se tulaga tofi na faaoloaina ai o ia i tomai eseese i le faatino ai o matāfaioi tausi o se ta’ita’i, ma le avea ai o se sui o le Kapeneta i totonu o le Palemene.
Ua faaalia e Winston Peters i le aga’i ai e amata ana tapenaga mo le faigāpalota o le a ia silasila e faamausalī sootaga ma tagata palota.
Puna o Faamatalaga: https://www.rnz.co.nz/news/political/562595/deputy-pm-handover-seymour-vows-straight-talk-peters-fires-up-campaign
