O lea ua savali i le lua vaiaso o loo sa’ili pea se tagata faifaiva na leiloa mai le sami i le faaitu o Raglan.

Ta’ua e se sooupu a leoleo, o le Aso Faraile talu ai na faaaogā ai se tama’i masini drone a leoleo e faalele atu i vaega mamao o le talafatai faapea ma le vaalele a leoleo i le Aso Toonai ma le Aso Sa, peitai e le’i faamanuiaina se tasi o nei sa’iliga.

O lea foi la ua toe faaauau sa’iliga a leoleo i lenei vaiaso e faaaogā ai foi se drone. 

E 20 ma ona tupu tausaga o se alii o loo sa’ilia, ina ua pa’ū i le sami le Aso Gafua talu ai aso 25 o Aokuso, i le 9.45 i le taeao.

E iai le talitonuga e le’i faia se ofu faaola o lenei alii.

O le vaega lea e leiloa mai ai lenei alii, le Papanui Point i Raglan, o se vaega ua iloga i le toatele o nisi ua malelemo mai ai talu mai le 2023 e tusa o le lipoti a le Water Safety.

Fai mai lipoti a le Matāgaluega o le Faasao, poo le Department of Conservation, ua sili atu ma le to’a 30 tagata ua maliliu mai lea vaipaona i le Papanui Pt talu mai vaitausaga mai le 1980.

I le upega tafa’ilagi a lea matāgaluega o loo lapata’ia ai tagata ina ia faaeteete i le aga’i atu e fai o latou faiva i luga o papa i lena vaipanoa.

Talosia e iai se tala fiafia e ono i’u iai le sailiga o loo faagasolo pea mo sia tagata faifaiva.

Puna o Faamatalaga: https://www.newstalkzb.co.nz/news/national/search-for-missing-raglan-fisherman-continues-a-week-after-person-seen-falling-into-sea/?dicbo=v2-nb0NlFb