O le toe faaauauina i le Aso Tofi o lenei vaiaso i Samoa o molimau a leoleo i le faamasinoga o le tama’ita’i tusi solo ma tala fatu o Papalii Sia Figiel, na faate’ia ai le faamasinoga i le tula’i o lē ua molia ma savali ese ma le potu faamasino, a o molimau se tama’ita’i o se matai o Lotofaga ae o se tasi e iai ona tomai a’oa’oina faafoma’i e faamautū i Hawaii ma Amerika Samoa.
Na tula’i ese Papalii Sia Figiel ma le potu faamasino numera 4 o le Faamasinoga Maualuga ma aga’i i le potu faamasino numera tasi e sosoo ma lea potu faamasino ma tagi faataitaiō ai, a o molimau le afioga Amituanai Dr Cecilia Alailima ma faamatala le oo atu o lē ua molia i lo latou aiga i Lotofaga i le Aso Toonai, 25 o Me o le tausaga ua mavae 2024, lea sa faailoa ai e Papalii Sia ia Amituanai lana gaioiga na ia faaoo ai le maliu i le tama’ita’i polofesa o Dr Caroline Sinavaiana Gabbard.
Na tolopō le molimau lea ina ua tula’i mai lea tulaga a o faagasolo lea faamasinoga e pei ona molia ai le tama’ita’i tusi solo ma tala fatu i le fasioti tagata faamoemoeina, fasioti tagata pa’ivalea, faaoolima tugā ma le umia o ni ‘au’upega mata’utia.
I le toe faaauauina o le molimau a Amituanai sa toe auai lē ua molia ae na faaopoopo ai loa le numela o leoleo e vaaia le puipuiga o lē ua molia a o faagasolo le su’esu’eina o le molimau mulimuli lea a leoleo.
