O le maota gasegase o Middlemore i Aukilani Niu Sila o loo faamautū iai le siiga gasegase a le ta’ita’i o le malo le afioga i le Palemia, lea na tuua le atunuu i le aoauli o le Aso Sa na te’a nei.
I se saunoaga a le afioga i le Palemia susuga Laaulialemalietoa Leuatea Polataivao Fosi Schmidt i upega tafa’ilagi i le po anapo sa ia faailoa ai, o loo manuia ma e leai se tulaga e faapopoleina ai le tapua’iga a le atunuu.
Se saunoaga i luga o upega tafa’ilagi a le afioga i le Palemia susuga Laaulialemalietoa Leuatea Polataivao Fosi Schmidt mai le maota gasegase o Middlemore i Aukilani Niu Sila.
I se pepa o faasalalauga mai le Malo i le amataga o lenei vaiaso ua faailoa ai, o faiga faavae a le malo e agavaa le Palemia i siaki ma togafitiga faafoma’i i Niu Sila ma e faatupeina atoa e le Malo.
Peita’i ona o le tulaga o loo iai nei vaegatupe a le malo i le 25 pasene o le tala faatatau o le tupe o loo faatino ma faagaioi ai galuega a le malo, ua finagalo ai le Palemia e faatupe lava e lona aiga pasese o vaalele, le tau o togafitiga i Niu Sila ma apitaga mo le Palemia mo le taimi nei.
O loo malaga faatasi le Palemia ma lona faletua.
